شهدات الأيام الأخيرة انتشار عدد من الفيديوهات فمواقع التواصل الاجتماعي، وخصوصا فايسبوك وإنستغرام كتوثق حالات نفوق حوالا فعدد من المدن المغربية من بينها كازا، سوا حتا كيشريوه الناس من الرحبة وكيموت اولا منين كيديوه للدار، ولكن كتبقا حالات معزولة في ظل توفر قطيع كبير من الأغنام، بالإضافة لمقاطع اخرين فيهم شكايات ديال مواطنين تعرضو للنصب من طرف بعض “الكسابة” اللي باعو ليهم أضاحي مريضة أو عندها إصابة فالعين مكيشوفش اولا فيها شي ولسيس وبالتالي مصالحاش .

وفهاد السياق، وفتصريح خاص “لكود” أكد الدكتور مجيد عنكيط، الطبيب البيطري ورئيس المجلس الجهوي للوسط الشمالي لهيئة البياطرة الوطنية، باللي المواطنين خاصهم ياخدو الحيطة والحذر ملي يبغيو يشريو الأضحية، باش يدوز عيد الأضحى فظروف مزيانة ويحافظو على سلامة الأضحية ديالهم.

ووضح الدكتور عنكيط أن من الأفضل شراء لحوالا من فيرمات معروفة ومراقبة من طرف أطباء بيطريين، أو من الأسواق المرخصة اللي كتخضع لمراقبة مصالح المكتب الوطني للسلامة الصحية للمنتجات الغذائية، مع التأكد أن الخروف خاصو يكون حامل لرقم تسلسلي فودنيه، باش يسهل تتبع المصدر ديالو فحال ظهرت شي مشاكل صحية.

وبخصوص نفوق لبهايم أكد الطبيب البيطري أنه ما كايناش حالياً أي ظاهرة مقلقة مرتبطة بنفوق أعداد كبيرة من الأغنام، داعياً المواطنين لعدم الانسياق وراء الإشاعات والفيديوهات اللي كتخلق البلبلة، مضيفا أنه فحالة نفق الحولي فيمكن إجراء تشريح بيطري لمعرفة السبب الحقيقي ديال الوفاة ودير الإجراءات اللازمة.

وزاد ونصح، رئيس المجلس الجهوي للوسط الشمالي لهيئة البياطرة المغاربة الناس باش يختارو حاولي بصحة مزيانة، ميكونش فيه لكحبا، وما عندوش سيلان فالأنف أو صعوبة فالتنفس، بحيت أن هاد العلامات ممكن تكون مؤشر على المرض أو الإجهاد أو ارتفاع الحرارة.

وشدد، المتحدث نفسو على أنه فحال ظهرت أعراض مرضية على الأضحية بعد الشراء، فمن الضروري التواصل مع طبيب بيطري تابع للمكتب الوطني للسلامة الصحية للمنتجات الغذائية أو مع طبيب من القطاع الخاص، من أجل فحص الأضحية وتشخيص الحالة وتقديم العلاج المناسب.

ومن بين النصائح المهمة اللي قدمها الدكتور عنكيط، هو مايشريوش المواطنين الحولي وايجيبوه للدار قبل العيد بفترة طويلة أو أكثر من أسبوع، حيت تغيير ظروف التغذية والإيواء مقارنة مع الضيعات ممكن يسبب اضطرابات فالأكل والهضم ويأثر سلباً على صحة الخروف.