تجاوزات نسبة الملء الإجمالية ديال السدود فالمغرب عتبة 76%، ووصلات اليوم الأحد بالضبط لـ76,03%. هاد الرقم كيعني انتعاشة حقيقية ومهمة بزاف مقارنة بنفس الفترة من العام الفايت (17 ماي 2025) لي كانت فيه النسبة فـ 40,22%.

وحسب الوثيقة الرسمية اليومية لي خرجاتها مديرية البحث والتخطيط المائي التابعة لوزارة التجهيز والماء، فالحجم الإجمالي الحالي ديال الماء لي مجموع فالسدود الموزعة على التراب الوطني وصل لـ 12 مليار و946 مليون متر مكعب، من أصل سعة إجمالية عادية كتقدر بـ17 مليار و27 مليون متر مكعب.

هاد التحسن الكبير بان بزاف فعدد من الأحواض المائية الشمالية والوسطى لي حققات أرقام قياسية، بحال حوض سبو لي كيتصدر المشهد بحجم مائي واصل لـ 4746 مليون متر مكعب، وبنسبة ملء كتقدر بـ 88,38%، ثم سد “الـوحدة”، لي هو أكبر سد فالمغرب، وصل الحجم ديالو لـ 3059 مليون متر مكعب (نسبة ملء 88,64%).

أما حوض أم الربيع لي عانى لسنوات من الجفاف، تنفس شوية هاد العام ووصلات نسبة الملء فيه لـ 65,65% بحجم مائي فايت 3284 مليون متر مكعب. في حين سد “المسيرة” وصل الحجم ديالو لـ 1120 مليون متر مكعب بنسبة ملء 42,28%، بينما سد “بين الويدان” حقق قفزة نوعية بـ 94,33%.

وسجل حوض اللوكوس نسبة ملء عالية بزاف واصلة لـ 92,13% بحجم مائي ديال 1802 مليون متر مكعب، اما حوض أبي رقراق النسبة فيه وصلات لـ 90,30% اي 1330 مليون متر مكعب، وسد “سيدي محمد بن عبد الله” واصل لـ 90,50%.

وسجل حوض تانسيفت أعلى نسبة ملء بين كاع الأحواض بـ 95,19%، وحوض ملوية وصل لـ 73,72% بحجم مائي ديال 517 مليون متر مكعب.

وخا هاد الأرقام كتفرح وكتطمن على المخزون المائي ديال البلاد، إلا أن التفاوت كاين بين الشمال والجنوب. حوض سوس ماسة يالله وصل لـ 54,82%، وحوض درعة واد نون واقف فـ 37,49%، فالمقابل حوض زيز كير غريس سجل 51,60%، أما حوض الساقية الحمراء وواد الذهب* فما زال مصفر بـ 0%.

هاد الانتعاشة المائية الكبيرة غادي تخفف بزاف من الضغط على الماء الصالح للشرب وكتعطي نفس جديد للفلاحة الوطنية، وخا كيبقى التحدي الأكبر هو التدبير العقلاني لهاد الثروة المائية باش دوز البلاد الصيف وهي مرتاحة.