عاجل.. الفايق دخل فإضراب على الماكلة من حبس تولال2.. مقرب منو لـ"كود": ها الشكاية اللي كيطالب تخرج من الحفظ ويستامعو لهادو .

مصدر الصورة

علي الصافي كود مكناس////

علمت “كود” باللي النائب البرلماني السابق رشيد الفايق دخل فالساعات اللي فاتت فإضراب مفتوح عن الطعام من سجن تولال2 اللي تهز ليه هادي ليام من حبس راس الما ففاس.

مقرب منو قال ل”كود” باللي الفايق كيطلب إخراج شكايو من الحفظ اللي كان الوكيل العام للملك ففاس دخلها للحفظ. شكاية كانت ضد محمد الشوكي اللي دابا كيرأس حزب التجمع الوطني للاحرار وفنفس الوقت برلماني، نفس الشكاية فيها النائب البرلماني من نفس الحزب التهامي الوزاني.

هاد الشكاية اللي كان تحطات عند رئيس النيابة العامة ومشات للوكيل العام للملك ففاس للاختصاص قبل ما تحفظ وفيها اتهامات للبرلمانيين بالابتزاز والنصب وطالب بفلوسو يرجعو ليه.

الفايق راه محكوم عليه ب8 سنين فقضايا ديال الفساد المالي ودابا دار مراسلة من الحبس للقضاء باش يخرجو شكايتو من الحفظ ويستامعو للي متهمهم.

وكان الوكيل العام ففاس هادي مدة تفاعل بالزربة مع هاد الشكاية كيف وصلات ليه من رئاسة النيابة العامة، وكلف أحد النواب ديالو ومشى للسجن المحلي راس الماء باش يسمع للفايق

وقالت مصادر “كود” باللي نائب الوكيل العام للملك دار ثلاثة زيارات للفايق باش يسمع ليه، غير أن هذا الأخير رفض الإدلاء بحتى شي معطيات يقدر يبدا فيها البحث القضائي

وكشفت مصادر “كود” باللي الفايق صرح لممثل النيابة العامة في الزيارة الأولى أنه ما غاديش يهضر حتى يكون المحامي ديالو حاضر معاه، والمرة الثانية ادعى أنه حتى يتفكر عاد يقدر يصرح بما جاء في الشكاية ديالو، بينما في المرة الثالثة أكد لنائب الوكيل العام للملك أنه مريض بزاف وميقدرش يهضر.

وأمام رفض المشتكي الإدلاء بأي إفادة حول مضامين الشكاية التي تقدمت بها دفاعه، قررت النيابة العامة حفظ الشكاية إلى حين ظهور عناصر جديدة يمكن معها فتح البحث القضائي.