فعيد العمال.. رئيسة جمعية التحدي للمساواة والمواطنة لـ“كود”: خاص مدونة الأسرة تعترف بـ“شقا الدار” والمرا هي السبب ف "ثروة" الراجل .. وهي أساس الاستقرار الأسري .

أميمة عطية – كود كازا ///

بمناسبة عيد لعمال ليوم جمعة 1 ماي ، كيرجع نقاش مخبي في ظل مكيبانش، هو نوع من أنواع لخدمة لي مكتظهرش للجميع ، ولي حاولو جمعيات وحقوقيات كتار يوضعوه في إطارو لقانوني وسياسي.
“شقا ديال دار ” ، لي كتقوم به لمرا كل نهار سواء كتشتغل او ربة بيت، وبيه باش كتساهم في استقرار الأسرة ولحفاظ على مكوناتها ، كيكون دايما عليه جدل بين الطرفين .

مصدر الصورة

وفهاد السياق، كالت بشرى عبدو، رئيسة جمعية التحدي للمساواة والمواطنة، فتصريح خاص لـ“كود”، إن لمرا اللي كتختار تخدم داخل البيت كتقوم بعمل شاق كيستحق الاعتراف والتقدير، مؤكدة أن “شقا الدار حتى هو خدمة” خاصها تعاون وتقاسم ديال لمسؤوليات بين الزوجين.

ووضحات عبدو ، أن هاد لخدمة ليومية فيها بصعوبة كبيرة، حيت لمرا كتكون أول وحدة كتنوض فالصباح وآخر وحدة كتنعس، وكتسهر على راحة جميع أفراد الأسرة، الشي اللي كيساهم بشكل مباشر فاستقرار البيت وكيخلي باقي المكونات يركزو على أنشطتهم خارج المنزل.

وأكدت رىيسة لجمعية ، أن غياب اعتراف قانوني بهد النوع من لعمل كيزيد من هشاشة ، خصوصاً فحالة النزاعات الزوجية، خيت كتلقى لمرا راسها بدون حماية أو تقدير للمجهود اللي دارتو طول سنوات، وكتخرج اديها طويلة ولهذا، دعات إلى ضرورة إدماج شقا الدار ضمن مدونة الأسرة لي غادي تخرج للوجود ، والاعتراف بيه كمساهمة أساسية فبناء الثروة المشتركة بين الزوجين، باعتبار ان لمرا هي لي كتعاون راجل باش ادير علاش ارجع .

وفي نفس الإطار، كانت خرجات لجمعية بلاغ ، شددات فيه على أهمية اعتماد سياسات عمومية منصفة، كتراعي المساواة بين الجنسين، من خلال إدماج “اقتصاد الرعاية” فالبرامج التنموية، وتخصيص ميزانيات كتأخذ بعين الاعتبار العمل غير المؤدى عنه.

و طالبت بتخفيف الضغط الضريبي على لعيالات، خاصة اللي كيجمعو بين لخدمة داخل وخارج لبيت ، نظراً للمجهود لمضاعف اللي كيقومو به ، حيت هادشي كيهدف بضرورة لاستقرار لعائلة وتحسين أوضاعها الاجتماعية.

وختمات بشرى عبدو تصريحها بالتأكيد أن التغيير الحقيقي خاصو يبداً من لعقليات لمغربية ، و الاعتراف بشقا دار ،خاصو أبدا من راجل لي خاصو اقدر زوجتو، بنتو، ختو ، واحفظ كرامتها .