كيما شارت لذلك “كود” فمقالة نشرتها نهار 03 أبريل وخلفت زلزال سياسي فجهة درعة تافيلالت ودفعات الأمانات الإقليمية لحزب الأصالة والمعاصرة بالجهة تخرج ما أسمته “بلاغ توضيحي” مكتوب بطريقة كوبي-كولي وبنفس الأسلوب، مازالت الأوضاع مشتعلة فحزب البام بهاد الجهة بسبب حرب التزكيات للي تسببو فيها بعض سماسرة الانتخابات للي بغاو يقصيو مناضلات ومناضلي الحزب باش يستقطبو صحاب الشكارة ويمنحو ليهم التزكيات.

هاد الأمر دفع بالعديد من أعضاء الحزب، وخاصة الشباب والنساء والأطر، باش يراسلو قيادة الحزب وعلى رأسهم المنسقة الوطنية فاطمة الزهراء المنصوري ويخبروها بهاد الممارسات للي كتنافى مع التزامات الحزب ومع التوجيهات ديال سيدنا فتخليق الحياة السياسية وتدعيم الديمقراطية داخل المؤسسات المنتخبة.

وعلى ضوء التقارير للي تم التوصل بها، تأكد للقيادة الجماعية للبام أن هناك فعلا سوء تدبير لشؤون الحزب بجهة درعة تافيلالت، وبللي الأمين الجهوي للحزب مولاي مصطفى العمري للي ضمن إعادة تزكية إبنه مولاي عبد الله العمري فدائرة الراشيدية، ما قامش بالمهام ديالو باش يحل المشاكل العويصة فالأقاليم الأربعة الأخرى للي كتعيش أزمة حقيقية.

فإقليم ميدلت مثلا، تسبب استقدام سعيد الطاهري من حزب الاستقلال في خلق أزمة كبيرة جعلات منتخبين وأعضاء البام يتداولو فقرار جماعي بمغادرة الحزب فحالة ماتعطاتش التزكية لأحد منتخبي الحزب وخاصة عمر أيت رهو، رئيس جماعة كراندو وحفيد القايد عدي أوبيهي. وفعلا، تجرى حاليا اتصالات باش يغادر عمر أيت رهو حزب البام نهائيا والالتحاق بحزب آخر.

من جهة أخرى، وفإقليم ورزازات، أدت محاولات رجل أعمال عضو فحزب التجمع الوطني للأحرار الالتحاق بالبام والحصول على التزكية إلى خلق أزمة كبيرة بعدما هددت البرلمانية إيمان لماوي للي عندها شعبية بمغادرة البام نهائيا هي وعدد كبير من رؤساء الجماعات والغرف. قيادة البام تدخلات فآخر لحظة وقررات توقف محاولات منح تزكية الحزب لهاد المقاول للي مدعوم من طرف مقاول كبير فاز مؤخرا بصفقة تفويت فندق كبير بالمدينة وللي عليها علامات استفهام.

فإقليم تنغير كذلك، الوضع مشابه لما يقع فالأقاليم الأخرى بعد محاولة إقصاء الشاب يوسف أوزكيط للي عندو شعبية كذلك وهو نائب رئيس جهة درعة تافيلالت باش تعطى التزكية لواحد رجل أعمال ما معروفش فالساحة وتكوينو السياسي ضعيف وما عندو تا شي صفة انتدابية باسم البام. القيادة الوطنية للحزب تدخلات أيضا فتنغير وكتحاول تقنع مقاول برلماني سابق هو حسن بواركالن باش يترشح، لكن الأخير رافض يعاود يتقدم بسبب ما عناه مللي كان برلماني ديال البام.

أخيرا، فزاكورة، أدى استقطاب رجل أعمال يملك شركة لنقل الركاب وكان عضو سابق فحزب الحركة الشعبية للي مثلها فمجلس الجهة سابقا إلى حدوث زلزال فزاكورة للي تعتبر دائرة الموت بامتياز فجهة درعة تافيلالت بحيث فيها تمثيلية قوية للأحزاب وخاصة الإتحاد الاشتراكي بقيادة عبد الرحيم شهيد، والاستقلال بقيادة ميمون عميري، والاحرار بقيادي أوعلال.

هاد الأزمة للي كيعيشها حزب الأصالة والمعاصرة فجهة درعة تافيلالت جعلات القيادة الوطنية للحزب تتدخل بين الأطراف المتصارعة وتوقف عملية دراسة طلبات منح التزكيات لحين استجماع كافة المعطيات فالأقاليم الخمسة، وهناك إجماع لدى القيادة بللي الأمين الجهوي للحزب مابقاش قادر يساير التطورات للي كتعيشها الساحة السياسية فالجهة.

الأسبوع القادم غا يكون حاسم بالنسبة للبام فجهة درعة تافيلالت والقرارات النهائية للي غا تتخدها القيادة الوطنية للحزب هي للي غا يكون ليها أثر سواءا إيجابيا أو سلبيا فنتائج البام فالانتخابات التشريعية ل 23 شتنبر المقبل بجهة درعة تافيلالت.

يشار بلي البام كلف رئيس الفريق النيابي احمد التويزي باش يقاد تزكيات هاد الجهة، وفشل. هاد السياسي فينما حط رجليه كيجلب غير المشاكل والانقسامات،