من بعد سبتة... حزب ”Nueva Melilla“ كيدعم مبادرة استرجاع الكنيات الأصلية ديال المغاربة فمليلية .

منذ

كود- سبتة//

فسبتة كان وقع مؤخرا واحد التطور قانوني مهم مرتبط بالهوية ديال السكان المغاربة، من بعد ما صادق البرلمان الإسباني على مقترح كيسمح باسترجاع الألقاب العائلية الأصلية اللي كانت تبدلات فالثمانينات فعمليات التجنيس.

هاد المستجد ما بقاش محصور غير فسبتة، ولكن ولى كيتشاف كملف مشترك بين سبتة ومليلية، حيث كيعكس نفس الإشكال التاريخي المرتبط بتوثيق الأسماء وطمس جزء من الجذور المغربية والريفية ديال عدد كبير من العائلات ومن هنا جا النقاش الحالي اللي كيدور على “جبر الضرر التاريخي” وإعادة الاعتبار للهوية الأصلية للسكان.

فهاد السياق حزب “مليلية الجديدة” علن باللي كيدعم المبادرة باش الناس يقدرو يرجعو لألقابهم العائلية الأصلية، اللي تبدلات ولا “تسبنات” مع الوقت.

الحزب قال باللي هاد الشي ماشي غير مسألة إدارية، ولكن حتى تصحيح لواحد الضرر تاريخي، حيث بزاف ديال العائلات تقطعات الصلة ديالها بالأسماء الحقيقية ديالها بسبب قوانين قديمة كانت كتفرض طريقة معينة فالتسجيل المدني.

وكيهدف هاد المقترح باش يسهل الإجراءات لأي واحد باغي يرجع للاسم ديالو الأصلي، وكيعتبرو حتى خطوة رمزية فيها اعتراف بالتنوع الثقافي اللي كيميز المنطقة، وزاد الحزب أكد باللي هاد المبادرة تدخل فإطار “العدالة الثقافية”، يعني كل واحد يكون عندو الحق يعتز بالجذور ديالو.

من جهة أخرى، كاينين جمعيات رحبات بالفكرة واعتابرتها خطوة إيجابية، وخا تقدر تنوض صداع مع بعض التيارات السياسية اللي ممكن تشوف فيها مساس بالوضع الحالي.