البي جي دي باقي مزال مخرجش من “الهزيمة” التاريخية لي تعرض ليها على يد حزب التجمع الوطني للأحرار ف انتخابات 2021، فمدن كبيرة وصغيرة، منها طنجة، لذلك حزب ديال الاسلاميين للي كيأمنو بالمشاركة السياسية حاول استرجع بلاصتو ولكن بنفس الاليات والاشخاص لي دخل بهم الانتخابات السابقة.

البي جي دي كثر من لقاءاتو التنظيمية فعدد من المدن مؤخرا باش يختار فرقتو للانتخابات المقبلة بزعامة عبد الاله بنكيران “جوكير” الاسلام السياسي بالمغرب.

وف طنجة، القلعة ديال الاسلاميين قبل ما بطيحو فيها ف 2021، نظم البي جي دي لقاء تنظيمي حسمت فيه القواعد في هوية شكون غادي يهز “لامبا” بدائرة طنجة أصيلة.

التصويت الداخلي عطى الصدارة للكاتب الإقليمي للحزب، محمد بوزيدان، بفارق مريح على باقي المنافسين. بوزيدان، اللي هو رئيس سابق لمقاطعة مغوغة، خدا التزكية كوكيل للائحة مؤقتا ف انتظار توافق عليه الامانة العامة للبي جي دي.

البي جي دي مخدم نفس الاليات السابقة، للي كتبينو ديمقراطي شكليا، ولكن ف العمق باقي حزب كيأمن باديولوجية معاكسة للحريات والديمقراطية كفلسفة وروح خصها تسري ف عروقهم، ويتقبلو بالاقليات وحرية التدين والاختيار ووو والمساواة. هاد الاليات مخدمها فكاع المدن، وطبعا طنجة فالصدارة، مدينة عرفات اكبر عدد من الوقفات والمسيرات التضامنية مع فلسطين.

اللائحة المقترحة اللي تصدرها بوزيدان ما كايناش فيها غير السمية ديالو بوحدو، بل كتضم وجوه بارزة ومجربة في العمل الجماعي والبرلماني بطنجة. من بين الأسماء القوية اللي كاينا في اللائحة، كنلقاو عائشة مجاهد، مستشارة جماعية ونائبة رئيس مقاطعة السواني سابقاً، ومحمد خيي، برلماني سابق ورئيس لمقاطعة بني مكادة سابقاً، ونعيمة بنعبود، مستشارة جماعية ونائبة عمدة طنجة سابقا، إضافة إلى مصطفى الشواطي ممثل لمدينة أصيلة.

هاد التشكيلة كتبين بلي البيجيدي لاعب على ورقة “التجربة” باش يحاول يسترجع الثقة ديال الساكنة اللي عاقباتو في انتخابات 2021. نفس الفريق طاح، ولكن بنكيران مصر يعاود ينافس به.

دبا واش هاد “التسخينات” التنظيمية غادية تكون كافية باش يرجع البيجيدي للحكم في طنجة؟ ولا تسونامي انتخابات 2021 ذوب لامبا ماشي غير طفاها بالريح للي جابت الحمامة للصدارة.