صراع “مونديالي” بدا بكري.. وهبي لوزير العدل الاسباني: نضيفوكم ونعطيوكم كولشي إلا كأس العالم..والوزير الاسباني رد عليه: فوز اسبانيا بالكاس مافيهش نقاش .

مصدر الصورة

گود الرباط//

وزراء العدل ديال المغرب وإسبانيا والبرتغال، مساء اليوم فحفل عشاء فالرباط، دخلو فـ “أجواء المونديال” قبل وقتها، ولكن بطعم ديال الدعابة وتبادل المساجات فآن واحد.

وزير العدل المغربي عبد اللطيف وهبي، للي نظم حفل استقبال على شرف ضيوفو نظيريه الإسباني والبرتغالي بكلام فيه ترحيب وحسن الضيافة اللي معروفة بها بلادنا، كيف عادتو لاح واحد الجملة اللي دارت الضحك والتشويق ف الحفل: “المغاربة معروفين بالكرم وحسن الضيافة وغانعطيوكم أي حاجة… إلا كأس العالم”. تصريح فيه مزاح، خلا القاعة تضحك ووزيري العدل الاسباني والبرتغالي ماتو بالضحة.

من جهتو، الوزير الإسباني فيليكس بولانيوس، ما ضيعش الفرصة وردّ بطريقتو: “كأس العالم غادي تربحو إسبانيا، وما كاين حتى نقاش فهاد الشي”. رد فيه ثقة زائدة، ولكن حتى هو داخل فإطار “التشويق” اللي كيسبق هاد الحدث المونديالي، واللي بان فيها أن التنافس موجود، ولكن فجو ديال الاحترام والتقارب.

وسط هاد “الديربي السياسي”، كيتعتبر هاد اللقاء هو الأول من نوعو كيجمّع وزراء العدل ديال ثلاث دول من قارتين مختلفتين، استعداداً لتنظيم مشترك لكأس العالم. وهنا كيبان أن الموضوع ماشي غير كرة، ولكن تعاون قانوني وأمني وتنظيمي كبير.

وهبي شدّد أن كرة القدم نفسها “مجموعة من القوانين”، بحال الحياة، فيها حكام وقواعد، وأكد أن المغرب باغي يرجع العلاقة بين القانون وكرة القدم بشكل حديث، مبني على التنظيم والحماية ماشي فقط العقاب.

التنافس على الكأس كاين، ولكن الأهم هو ربح تنظيم مشترك ناجح، يجمع إفريقيا وأوروبا فعرس كروي عالمي، يكون فيه القانون حاضر لضمان الفرجة، ماشي باش يخنقها.