لأول مرة التليفونات غتبقى خارج قاعات الامتحانات فالباك.. وزارة التعليم زيرات الشغل على الغشاشة .

مصدر الصورة

عمر المزين – كود///

صيفطات وزارة التربية الوطنية والتعليم الأولي والرياضة، البارح الثلاثاء، مذكرة لمدراء الأكاديميات الجهوية للتربية والتكوين وللمفتشية العامة للشؤون التربوية، فيها مجموعة ديال الإجراءات اللي الهدف منها هو تحسين جودة الامتحانات الإشهادية وضمان مصداقية النتائج ديالها.

هاد الإجراءات كتشمل تنظيم عملية الدخول لمراكز الامتحان، مع إلزام المترشحين يسلمو التليفونات ديالهم وجميع الوسائل الإلكترونية قبل ما يدخلو، وكيتم تخصيص بلايص داخل المراكز باش يتحطّو فيها حتى يسالي الامتحان.

كما نصات المذكرة، اللي كتوفر “كود” على نسخة منها، على تعميم النظام الإلكتروني باش يعاون فـرصد حالات الغش وضبطها فمختلف مراكز امتحانات الباك، وهاد الشي باش يتصدى لاستعمال الوسائل التكنولوجية اللي صعيب تتكشف بالطرق التقليدية.

وأكدات الوثيقة حتى على تفعيل دور اللجان المحلية فـرصد الغش داخل جميع مراكز الامتحان، وتنظيم الخدمة ديالها، مع تعزيز دور الملاحظ فتتبع الحالات وتقييم مدى احترام مساطر الزجر، مع إعداد تقارير فـ نهاية كل حصة.

وشددات كذلك على ضرورة تفعيل اللجان المتنقلة باش تراقب مدى الالتزام بمحاربة الغش داخل المراكز، وتنظيم التدخل ديالها إلا اقتضى الحال، وزادت أكدت على الدور المركزي ديال المفتشية العامة للشؤون التربوية فمراقبة احترام الضوابط خلال إجراء وتصحيح الامتحانات.

كما تقرر إحداث “خط أخضر” على المستوى الوطني، ومعاه آليات مماثلة فالأكاديميات الجهوية، باش يتم التبليغ على أي خروقات ممكنة خلال الامتحانات، وهاد الشي باش يكون تدخل سريع وفعّال سواء على المستوى الإقليمي أو الجهوي.