فرنسا اسبانيا إيطالية تركيا، هادو أهم الدول السياحية في العالم وقريبة لينا، البعض منهم بحال إسبانيا راه عندها فائض في السياح، القاسم المشترك بيناتهم من غير انهم اقتصادات قوية ولكن دول علمانية، حتى تركيا لي أغلب سكانها ينحدرون من الإسلام راها قمة العلمانية، الدين في هاد الدول لا يتدخل في الحياة العامة للناس، دولة بحال إسبانيا ولات كتعاني من كثرة السياح مدن بحال برشلونة مابقاوش بغاوهم وكيخرجوا مظاهرات ضد السياح والسياحة، ومع ذلك المغرب ماقدرش يستافد من هاد الفائض، علما انه مكاين اختلاف كبير من ناحية المناخ والموقع الجغرافي والقرب من هاد الدول نيت، الاختلاف الجوهري هو أننا دولة عندها دين رسمي وتحكم بالدين وخاص السلوكات ديال الناس فيها تتماشى مع تعاليم وقيم ديال الجزيرة العربية في القرن السابع ميلادي.

كنظن أن تبني الدولة المغربية لدين رسمي كيوقف حاجز بينها وبين التقدم واللحاق بالدول المتطورة.. أصلا مكاينش دولة متطورة محترمة وعندها دين رسمي .. الدين شأن فردي والدولة لي كتدخل راسها في هاد الشبوقات كتبقى ديما في أسفل السافلين، قارنوا غير بين هاد الجهة من المتوسط والجهة الأخرى، كل الدول في هاد الجهة في أسفل السافلين حتى الدول لي عندها ثروات طبيعية بحال ليبيا والجزائر، بلدان مكيفكر حتى واحد يزورها او يشوف جيهتها، وأغلب العلمليات الإرهابية لي وقعات في أوروبا في السنوات الأخيرة كانوا مسؤولين عليها مواطنين من أصول هاد الجهة من المتوسط، راه ماشي بالضرورة ندوزو داك المخاض كامل لي عاشتو أوروبا من حروب دينية وإبادات جماعية وصولا للثورة الفرنسية والحروب النابليونية وجوج حروب عالمية، عاد وصلوا للعلمانية ودولة الرفاه، راه يمكن نتخطاو هادشي كامل ونوصلوا لعلمانية الدولة ديريكت، الصين باش تقدمات في عشرين او تلاتين عام اللخرة مارجعاتش للقطار البخاري دخلات ديريكت للتكنولوجيا.

كوسطا ديلصول من أشهر الأماكن الشاطئية شهرة وسياحة في العالم، كاين گاع جنسيات مستقرين فيها العام كامل، من غير البنية التحتية الجيدة راه جغرافيا ومناخا مكاين حتى شي فرق بينها وبين شمال المغرب وبالخصوص الساحل الشمالي بين مارتيل المضيق الفنيدق، الفرق الجوهري هو الحرية وحب الحياة والنشاط والفرحة والضحكة من القلب، ماشي هاديك لي كتشوفها في وجوه جامع الفنا، وكثرة الأنشطة والمستثمرين ناشطين، والسبب بسيط وممكن يتدار حتى هنا وهو طلق اللعب للحريات، للطاسة بالخصوص، ماحد معندكش مكة في البلاد او الاهرامات علاش غادي يخلي الواحد أوروبا ويجي للمغرب يخسر الفلوس وفين غادي يخسرها أصلا في طاكوس ومونادا طوپس، راه خاص تبيع الحرية والنشاط، جزر كاينة في آخر الكرة الأرضية بحال بالي وجزر تايلاند، مغاربة نيت ميركبوا ليها بمليون وكيعيشوا تجربة حسن مينساوهاش حياتهم كاملة، بينما شواطئ خيالية في المغرب راها كتعيش سياحة قهوة كحلة والكرارس ديال الكبال والكرموص، راه الحرية هي أهم منتج سياحي في العالم.