واش مخاصش الدولة تدير دراسة باش نعرفوا واش السلفية كتحمق، أو بنادم فاش كيحماق ويمرض نفسيا كيرجع قابل يكون سلفي، أو راه أي سلفي حمق وقادر يقتل في أي وقت، وشنو الحل لي خاص يدار، واش تدار حملة على گاع السلفيين ولي حماق منهم يمشيو لطبيب، أو تمنع السلفية في المغرب لي كتحمق الناس .

مصدر الصورة

محمد سقراط-كود///

مؤخرا عدة جرائم قتل داروها سلفيين حماق حسب الدولة.. واش مخاصش الدولة تدير شي جرد أو إحصائية أو دراسة باش نعرفوا واش السلفية كتحمق، أو بنادم فاش كيحماق ويمرض نفسيا كيرجع قابل يكون سلفي، أو راه أي سلفي حمق وقادر يقتل في أي وقت وخاص يدير بنادم منهم أطانسيو… وشنو الحل لي خاص يدار، واش تدار حملة على گاع السلفيين ولي حماق منهم يمشيو لطبيب، أو تمنع السلفية في المغرب لي كتحمق الناس، داك العام واحد شق راس سائحة في تيزنيت بشاقور هاد السيمانة واحد سيفطوه ريفولي من آخر قلاع السلفية في العالم أوروبا ناض قتل إمام ديال الجامع، وخاص نعرفوا باش مايوقعش الغلط عوتاني حيت على مايبدو أن السلفيين الحماق قنابل موقوتة كتمشى في شوارع المغرب.

هاداك المختل العقلي أي قتل سائحة في تيزنيت وهبط لأكادير يدير كثر، فاش تشد كان لابس اللباس الافغاني وداير اللحية وعندو الشكل المثالي للإرهابي الداعشي المختل عقليا، بنادم لي يدير حزام ناسف ويمشي يتفرگع في سوق ديال الدراوش راه باينة مختل عقلي، ولكن واش كان مختل عقلي فاش قرر يولي إسلامي متشدد، أو أن التطرف الإسلامي هو لي كيرد الواحد حمق وقتال ومجرم وإرهابي، حيت على مايبدو هاد الاحداث كتكرر ديما وبنفس الشخصية تقريبا، واحد لحية سلفي كيطلع ليه لخرى للراس كيبغي يودع ولكن باغي يدخل للجنة، كيدوز يجاهد فشي إنسان بريئ، على مايبدو هاد الفكر راه مرض عقلي خطير مؤذي للمجتمع وعندو ضحايا كثار لحد الآن.

العلماني فاش كطلع ليه الدنيا في راسو وكيهرب ليه كيدير كوردة ويعگدهم بوحدو، كيعذب معاه عائلتو ولكن كيمشي بلا ضحايا، على عكس اللحية فاش كيهرب ليه كيخرج يجاهد في جيرانو وفي السياح أو بوليسي شاد السربيس بحال بوليسي الرحمة الله يرحموا، أو يدير شي كارثة عالمية بحال لي دارو دوك القتالة ديال شمهاروش، هاعلاش الدولة مطالبة تشرح لينا هاد الظاهرة ديال عنف اللحايا، وكيفاش خاص تحارب، وعلاش لا تشارك التجارب مع الدول لي نجحات في محاربة الإرهاب، علاش المغرب مايستلهمش من تجارب تركمنستان وطاجيكستان واذربيدجان في محاربة الإرهاب، راه عندهم نفس السمية مع افغاتستان وباكستان ولكن واهم خاليين من الإرهاب، ومن اللحايا الحماق لي كيذبحوا الأئمة المغاربة والسياح .