والا أخاي السيمو دالقصر. سيدنا ماخاصوش يعوض تجار القصر او الكسابة لي تضرروا بسباب الفيضان، هادي خاص تكون خدمة شركات التأمين، وخاص يكون كل تاجر وفلاح ومستثمر وملاك داير تأمين على الممتلكات ديالو ضد الكوارث الطبيعية والسرقة وباقي الآفات، سيدنا راه كريم وفي زلزال الحوز دار صندوق تضامن حط فيه من فلوسو، ولكن ماخاصش تكون هادي هي القاعدة عند المواطن، ويبقى يتسنى سيدنا يعاونوا في أي كارثة، واحد كيدير التجارة خاص تكون سلعتوا محسوبة مخلص عليها الضريبة وداير ليها تأمين، وقعات شي كارثة ميقصد شركة التأمين ماشي يبقى يتسنى سيدنا، آش هاد العقلية ديال ماقبل الدولة الحديثة، راه ماشي هاكا كيتبنى الاقتصاد والدول بل بتحمل المسؤولية وأخد الإحتياطات.

التضامن فعل زوين وهو لي كيخلينا بشر وبسبابو خرجنا من الغابة وكونا مجتمعات تطورات فيما بعد اللإميراطوريات، ولكن باش يبقى الواحد كيتسنى التضامن أو الإغاثة بلا مايدير هو حتى حركة راه ماشي منطقي هادشي، دابا في الفيديوات وليتي تسمع شي ندائات غريبة كيدخلوا الشك للواحد، وافيناهوما المؤثرين وافيناهوما المرشحين وافيناهي الدولة، وافيناهوما الصحافة وافيناهوما المحسنين، وفيناهوما صحاب تيك توك يجيو يشوفوا هادشي. هادي راه بحال شي موجة جنون جماعية بنادم ماعارفش حتى شكون خاص يتدخل وفين وعلاش، بنادم كتقوليه خوي دارك واحد السيمانة راه تقدر تموت كيقوليك منتحرك من هنا حتى تعطيوني برطمة شوكية تلاتة دالبيوت وصالون وقبلية، وبغيت كوري قد الكوري ديال ولد البيض بالسراغنة نحط فيه كسيبتي، كتولي تسمع شي مطالب غير منطقية ولكن كتبان معقولة في هاد الوقت حيت الناس ولفوا الدولة كتعطي الفابور، عندك براكة كتولي بقعة في عشرسنين، نص البلاد واخد فليستيفادة، اذن علاش حتى حنا لا، هادي هي العقلية السائدة.

المغرب حاليا دولة عصرية وخاص تسير وتمشي بهاد المنطق، النظام والقانون خاص يعم گاع القطاعات، عندك حانوت او سناك ديال البيصارة، راه هاص تكون عندك رخص ديالك وكتخلص الضريبة والتأمين، نهار لاقدر الله توقع ليك شي حاجة تتعوض من طرف الشركة، ماشي تبقى تسنى الصدقة والمعاونة، هاد العقلية ديال الإحسان هي زينة وبيها دوزنا كورونا كمثال، ولكن ولات بحال إستحقاقية لي وقعات ليه شي حاجة الدولة كاينة والمحسنين كاينين وغادي يعاونوه، آه الى عطى شي حاجة الله يجازيه ولكن خاص حتى المواطن يكون كيساهم في صناديق مالية سواء ديال الدولة او الخواص كشركات التأمين، ويكونوا قوانين منظمة لهادشي بحال لي كاين في الدولة الحديثة، راه ماغاديش نختارعوا شي حاجة من راسنا غادي نقلوا غير تجارب نجاحة في دول خرى وصافي.