اعتذرت الفنانة الشابة جويرية حمدي، عن تصريحاتها في فيديو نشرته عبر مواقع التواصل الاجتماعي، انتقدت خلاله منشور يتحدث عن تحريم صراخ المرأة أثناء الولادة، حتى لا يفتن صوتها الرجال، وتبين لها من التعليقات أن الصفحة التي نشرت الأمر غير حقيقية.

جويرية التي عرفها الجمهور طفلة من خلال مشاركتها في برنامج اكتشاف المواهب الغنائية ذا فويس كيدز قبل أعوام، تعرضت بسبب الفيديو وتصريحاتها التي هاجمت فيها محاولة البعض إظهار الإسلام بصورة غير حقيقية، إلى انتقادات واسعة وهاجمها عدد من متابعيها ورواد مواقع التواصل الاجتماعي بطريقة غير لائقة، وهو ما أغضبها ودفعها للرد، بعد حذف الفيديو.

جويرية حمدي تعتذر لهذا السبب

وكتبت جويرية عبر صفحتها الرسمية على "فيسبوك": "أولا وقبل أي شيء أنا بعتذر لحضراتكم على الفيديو اللي نزلته من يوم، ومش هضيع وقت حضراتكم في تبرير موقفي أو البحث عن أعذار عشان أطلع نفسي على حق، بس صدقوني أنا لما بطلع أتكلم معاكم وأحكيلكم على كل اللي بيخطر على عقلي، مش بيكون في نيتي أي شر وإنما عشان بحب أشارك معاكم وأسمع رأيكم".

وتابعت "وبالنسبة لآخر فيديو فأنا لما طلعت اتكلمت عن الموضوع ده، كان بسبب إني فعلا تأذيت بسببه وكنت حاسة إن ده يتعارض تماما مع تعاليم ديننا اللي أكرم وأحسن إلى المرأة، عشان كده ما كنتش حابة إن ده يكون شكلنا قدام الغرب، وصدقوني وأنتم أعلم مني أن الغرب بالفعل بقى عنده ما يسمي بالإسلاموفوبيا بسبب الأفلام والمسلسلات اللي بتتعمد الإساءة إلى رجل الدين، فلما شفت الكلام ده اللي يصل إلى حد العبث قلت لازم أتكلم فيه وأقول إن ده مش بيمثل الإسلام".

جويرية حمدي: أنا غلطانة

وأوضحت جويرية أنها لم تكن تعرف أن الصفحة التي أخذت عنها المنشور وعلقت عليه غير حقيقية "ما كنتش أعرف إن ده أكونت مش حقيقي وإن الهدف من الأكونت أصلا هو السخرية من الإسلام، بس فيه نقطة حابة أوضحها لحضراتكم وهو إن حضراتكم بتقولوا إن الأكونت ده كان موجود والناس عارفة قصته وغرضه من 2010 أو 2012، هل حضراتكم عارفين أنا كان عندي كام سنة وقتها؟ أنا فعلا لسه شايفاه، ووالله ما كنت أعرف إن ده أكونت مش حقيقي، وأنا مش بقول كده عشان ما أقولش على نفسي غلطانة".

وأضافت "أنا فعلا غلطانة لسببين: أولهم إني لم أتحرى الدقة وأبحث وأعرف إذا كان حقيقي أو لأ، ثانيا إن زي ما حضراتكم قلتم إن فيه أطفال وبنات صغيرين بيتابعوني ومينفعش أطلع أتكلم في حاجة بغير علم، عشان ما أثرش عليهم تأثير سلبي، بس بإذن الله الموضوع ده مش هيتكرر تاني".

جويرية حمدي تهاجم من خاضوا في سيرتها

وحرصت جويرية في نهاية منشورها على توجيه عتاب لمن خاضوا في سيرتها، وهاجموها بشكل غير لائق، وكتبت "بس اسمحولي أعاتب حضراتكم عتاب محبة مش كراهية، الناس اللي دخلت خاضت في عرضي وشتمتني أنا وأهلي بأفظع الشتائم، هل فكروا في الأذى النفسي اللي حصلي؟ كنت أتمنى النصح والتقويم بدون الإساءة إلى أهلي والتجريح فيا، وأكيد مش مسامحة أي حد شتمني وخاض في سيرتي وعرضي".

وأضافت "وأطمع من الله عز وجل أن يغفر لي هذا التقصير وواثقة إن شاء الله ربنا يستجيب فهو من قال في كتابه العزيز ﴿إِنَّمَا التَّوْبَةُ عَلَى اللَّهِ لِلَّذِينَ يَعْمَلُونَ السُّوءَ بِجَهَالَةٍ ثُمَّ يَتُوبُونَ مِن قَرِيبٍ فَأُولَٰئِكَ يَتُوبُ اللَّهُ عَلَيْهِمْ ۗ وَكَانَ اللَّهُ عَلِيمًا حَكِيمًا). وفي الختام: أنا بنت عادية جدا، وعشان أكون صريحة معاكم أكيد فيه حاجات كتير في تصرفاتي ممكن ما تكونش أحسن حاجة بس والله بحاول إني أكون أحسن، بس أتمنى إنكم لو شفتم فيا حاجة محتاجة تتحسن أو تتعدل تساعدوني مش تساعدوا الشيطان عليا، حتى النبي عليه أفضل الصلاة والسلام قال لا تكونوا عونَ الشيطانِ على أخِيكمْ، فياريت لا تعينوا الشيطان على أختكم وإن شاء الله أفضل طول ما أنا عايشة أتعلم وأحسِن من نفسي. بعتذر على الإطالة بس بجد كان لازم أقولكم الكلام ده. شكرا".

مصدر الصورة مصدر الصورة