السيسي: لم أستهدف دماء أحد.. و"الإخوان هم من بدأوا العنف"

دبي، الإمارات العربية المتحدة ( CNN )-- عاد الرئيس المصري عبدالفتاح السيسي ، السبت، إلى ما شهدته البلاد خلال مظاهرات 3 يوليو/تموز عام 2013، والتي أدت إلى إنهاء حكم الإخوان المسلمين في البلاد بعزل الرئيس الأسبق محمد مرسي، متهمًا "الإخوان بأنهم هم من بدأوا بالعنف".

وقال السيسي في كلمته خلال الاحتفال بعيد الشرطة المصرية: "أنا من أول ما أنا كنت وزير لغاية دلوقتي، ما عملتش إجراء بفضل من الله سبحانه وتعالى، استهدفت به دماء أحد. والله يشهد على ذلك. يعني هما اللي بدأوا. وافتكروا، وأنا بقول كده عشان تقولوا وتجيبوا البيانات اللي إحنا طلعناها، البيان بتاع 3/7 (2013) اقرأوه! اقرأوه شوفوا كان معمول إزاي. كله لطف وكله محاولة للتوافق والإصلاح، وإن إحنا ندي فرصة لنفسنا تاني لدورة جديدة، مش دورة جديدة بحد (رئيس) جديد، دورة جديدة بالانتخابات والشعب يقولها. لما نختلف، طب لما نختلف وخلاص خلوا الشعب يقول، انتخابات تاني، ده اللي تقريبًا في 3/7 اتقال".

ومضى الرئيس المصري يقول: "ولا قبل منه بيوم أو بساعة تم القبض على حد".

وأكد السيسي: "في سيناء هما (الإخوان) اللي بدأوا، في القاهرة وفي الجمهورية هما اللي بدأوا. مين اللي ضرب النار ومين اللي ولع؟، فالبلد تسعنا كلنا. طب كان هيتعمل إجراء؟ والله يشهد على كلامي ده - لو كانت الناس سكتت وقالت طب اعملوا انتخابات زي ما كنا مقررين، كنا عملنا انتخابات وينزل فيها الله يرحمه الرئيس مرسي (في إشارة إلى الرئيس الأسبق محمد مرسي)، ونشوف لو أنتم عايزينه تاني خلاص بقى اسكتوا. طلعتوا ليه ما هو أنتم عايزينه أهو؟ ما نجحش خلاص يبقى (حفظ) ماء وجهه ومفيش، وماء وجه الناس اللي كانوا موجودين. لكن ربنا يكفيكوا شر عمى البصيرة".

وتابع الرئيس المصري: "لازم تعرفوا إن المشاكل اللي حصلت قبل في 2010 وما قبلها، كانت إرهاصًا لحالة مصر، حالة مؤسساتها، بمنتهى الشفافية والأمانة. ده معناه إن مؤسسات الدولة عندنا كانت بعافية".

وأكد السيسي أن "التطرف بوجهه البغيض وأفكاره الهدامة، لن يجد في مصر أرضًا ولا مأوى، فالوحدة الوطنية هي درعنا الحصين، ويقظة قواتنا المسلحة وشرطتنا ووعي شعبنا، هي الحائط الذي تتحطم أمامه كل المؤامرات والدسائس والشائعات المغرضة. ومهما حاول الأعداء زرع سموم الأفكار الهدامة، أو بث الشائعات المضللة، فمحكوم عليها بالعدم والاندثار. وستظل مصر، بفضل الله وعونه، عصية على الفتن، منيعة أمام المؤامرات...".

ومضى السيسي: "وانطلاقًا مما تشهده بعض الدول من محاولات باتت نمطًا متكررًا، تؤكد مصر رفضها القاطع والحاسم لأي مساعٍ تستهدف تقسيم دول المنطقة أو اقتطاع أجزاء من أراضيها أو إنشاء ميليشيات وكيانات موازية للجيوش والمؤسسات الوطنية الشرعية... وأنا من غير ما أشاور على أسماء معينة، أقول إن الدول اللي افتكرت أنظمتها إنها لما تنشئ ميليشيات، هذه الميليشيات ممكن تقوم بدور، كانت الميليشيات دي سبب بشكل أو بآخر في تدمير الدول، واللي عملوا كده مشيوا ومحدش حماهم".

وخاطب السيسي المصريين بقوله: "افخروا ببلدكم إنه خلال المدة من 2014 لغاية النهاردة، لم تتورط مصر في مؤامرة أو تخريب أو تدمير أو إيذاء أو قتل حد خالص في المنطقة بتاعتنا".