غسان الخوري: القوات بددت في وزارة الطاقة ٦٠٠ مليون دولار واخر انجازاتهم تفريغ بواخر بلا تدقيق بالمواصفات

مصدر الصورة

اشار نائب رئيس التيار الوطني الحر للشؤون الإدارية غسان الخوري في بيان ردا على ما جاء في بيان للنائب السابق عماد واكيم ، الى انه "بزمن المحلّ، القوات تنفض الغبار عن وجوه غابت سنين، وتستنجد بكل صوت جاهز ليشتّم ليغطّي على فشلها المزمن بملف الطاقة وبغيره. ولكن الوقائع أوضح من كل محاولات التضليل:

1- حين كانت وزارة الطاقة مع التيار، التغذية وصلت فوق ٢٠ ساعة، وحتى بعد الأزمة الاقتصادية سلّمنا الوزارة على ١١ ساعة. اليوم؟ ساعتين لا غير، علماً ان الوزارة وقتها كانت محاصرة، ومشاريعها ممنوعة من التنفيذ، أمّا اليوم، الوزارة محاطة بدعم داخلي وخارجي غير مسبوق… والنتيجة انهيار شامل بالتغذية والمشاريع. هذا ليس ظرفا… هذا فشل إداري كامل.

2- استلمتوا تعرفة مصحّحة بتغطي الكلفة وبتأمّن أرباح. شو عملتوا فيها؟ طفّيتوا المعامل، وتباهيتوا إنكن ما عم تطلبوا مال من الخزينة… بينما حمّلتوا الناس فاتورة مولّدات بلا رقابة، بلا ضوابط، وبلا أي حسّ بالمسؤولية. هيدا مش إصلاح… هيدا تخلّي عن واجبات الدولة.

3- استلمتوا ٦٠٠ مليون دولار بين حساب كهرباء لبنان والفواتير المستحقة. بدّدتوا المصاري، وصرتوا عاجزين تشتروا محروقات لتشغيل المعامل. وآخر “إنجازاتكن”: تفريغ بواخر بلا تدقيق بالمواصفات… وبعدها بتحكوا عن إدارة ورقابة؟ هيدا نموذج عن سوء إدارة ما بيتخبّى.

4- عقد المحروقات مع العراق ، الذي كان يوفّر الفيول ويدفع داخل لبنان، لغيتوه… واليوم عم تركضوا لتعيدوا الاتفاق نفسه. يعني لا رؤية، لا بديل، ولا حتى قدرة على الحفاظ على مكسب قائم. والنتيجة سياسة تخبيص كلّفت اللبنانيين مليار ونص دولار بالسنة وما زالت عم تزيد الأعباء يوميًا. هذا من دون الحكي بالعجز بتأمين المياه للناس وتنفيذ مشاريع الطاقة المتجددة والصرف الصحي ووبعد كل هذا، يتم التهديد بملفات القضاء حسمها وطلعت فاضية… متل وعودكن، متل خططكن، متل إدارتكن.

وختم الخوري: الإنجازات واضحة، والأرقام بتحكي، والناس بتعرف: لما توصلوا لتحقيق حاجات الناس بملف الكهرباء، وغيرو، ساعتها احكوا. ومن هلق لوقتها… تواضعوا، لأن بعدكن لا عارفين شو بدكن ولا شو فيكن تعملوا.