هانى فرحات ينتقد تصريحات رضا الوكيل عن ميزانية مهرجان الموسيقى العربية: «كلام غير مسؤول»
انتقد المايسترو هانى فرحات تصريحات الدكتور رضا الوكيل، رئيس دار الأوبرا المصرية، بشأن محدودية الميزانية المخصصة للدورة الـ34 من مهرجان ومؤتمر الموسيقى العربية، وعدم القدرة على استقطاب عدد أكبر من نجوم الغناء العرب، مؤكدًا أن الحديث عن الإمكانات المالية للمهرجان بهذا الشكل لا يليق بقيمة الحدث وتاريخه، بحسب تصريحاته الخاصة لـ«المصرى اليوم».
وقال هانى فرحات لـ«المصرى اليوم»: «تصريحات ليست فى محلها، وما يحزننى إن الشخص المسؤول بمنصب بحجم رئيس دار الأوبرا لا يكون مسؤولًا فى كلامه وحديثه، وما يمكن الحديث به فى مؤتمر صحفى عالمي».
وأضاف: «حزين جدًا على إن يبقى فيه مسؤول قاعد على كرسى زى ده ما يعرفش قيمة الكرسى ولا قيمة مهرجان أقدم وأعظم مهرجان موسيقى اتعمل سنة 1934، مهرجان الموسيقى العربية اللى حضره فارتوك، أحد العظماء، وله تاريخ، كيف تختزل تاريخ المهرجان وتقول إن البلد ما عندهاش فلوس؟».
وأوضح فرحات أن تصريحات رئيس الأوبرا، من وجهة نظره، لا تتناسب مع طبيعة العلاقات المصرية مع الدول العربية، قائلًا: «كيف له أن يقول هذا الكلام فى مؤتمر صحفى وأن يعلّق فشله على شماعة إن أشقاءنا العرب معاهم فلوس؟ إزاى الكلام ده؟ الراجل دولة، المفروض راجل مسؤول، بيتكلم عن علاقات دولية وعلاقات قوية جدًا».
وتابع: «لن أرجع كلامه كإسقاط على السعودية، الحقيقة هاخد الكلام على إنه بيتكلم على كل أشقائنا العرب، إن مسؤولًا كرئيس للأوبرا فى الدولة يطلع يقول كده فى مؤتمر صحفى لمهرجان عظيم زى مهرجان الموسيقى العربية، حاجة تزعل وحاجة تحزن».
وأشار فرحات إلى تجربته السابقة فى إدارة المهرجان، قائلًا: «أنا كنت رئيس نفس المهرجان ده، كنت رئيس مهرجان الموسيقى العربية فى الدورة 32، وكان عندى ظروف أصعب كتير من دى بكتير، وكان عليّ ضغط إن أنا ما أدفعش دولار يطلع أو أى عملة صعبة، وفى أجانب وكده، ومع ذلك كان معانا نجوم من كل الوطن العربى كله».
وأضاف: «إنت مش عندك حلول، قول معنديش حلول، لكن متجيبش سيرة مصر، عندك ستين ألف حل وطريقة، إنت ما عندكش، إنت راجل ما عندكش حلول، قول أنا ما عنديش، فييجى حد عنده ويقدر يفكر ويوفر فلوس للمهرجان، يبقى عارف قيمة المهرجان ده عاملة إزاى وعارف تاريخه وأهميته».
واختتم هانى فرحات تصريحاته قائلًا: «إنت عندك مشكلة، فتقول أصل أشقائنا العرب عملولك إيه؟ أشقائنا العرب إيه دخلهم فى الموضوع؟ كلام غير مسؤول تمامً، وإن شاء الله الأمور هتتصلح الفترة الجاية وأنا متأكد من ده».
.jpg)
