حصلت «المصرى اليوم»، على نص اعترافات مهندس معمارى يُدعى «إياد»، أمام النيابة العامة بتخطيطه المسبق لقتل 4 من أفراد أسرته وأقاربه وإصابة نجله، إثر خلافات مالية وزوجية ممتدة منذ عام 2020، إذ اعترف بشرائه سلاحًا ناريًا وذخيرة حية عبر شبكة «الدارك ويب»، وتجهيز حقيبة بها أدوات حادة وصاروخ كهربائى وجنزير، قبل أن يطلق 16 رصاصة فى أقل من 30 ثانية أنهت حياة المجنى عليهم داخل شقة سكنية فى 15 مايو.، إذ تنظر محكمة جنايات القاهرة أولى جلسات محاكمة مرتكب الواقعة 16 سبتمبر الجاري.

نص اعترافات مهندس 15 مايو المتهم بقتل أسرته أمام النيابة العامة

وعن بدايات حياته الأسرية وتفاصيل الخلافات الأولى، قال المتهم أمام النيابة العامة: «اللى حصل إنى تزوجت المدعوة (رحاب.م) فى عام 2002 وأنجبت منها 4 أولاد وهم كل من: 1- جنة الله (22 سنة)، 2- عابد (21 سنة)، 3- صفوة (20 سنة)، 4- براءة (13 سنة)، وكانت حياتنا طبيعية جدًا، وكنت أنا شغال فى قطر من سنة 2014 وهما مقيمين هنا فى 15 مايو مسكن الزوجية، ومكنش فيه أى مشاكل لحد سنة 2020، أول مشكلة حصلت ما بينا إنى أديتها فلوس 500 ألف جنيه تحوشهم واتفاجأت بعدها إنها أديتهم لأخوها (هاني) عشان يشترى عربية لنفسه، ساعتها أنا سكت لحد أما أنزل إجازة من قطر وأخوها (هاني) كلمنى وأنا هناك وغلط فيا، فأنا طلقتها شفاهة على الواتساب وقتها وبعدين رجعتها عالواتساب بعدها بشهر».

وأضاف المتهم سرده لتصاعد الأزمة الأسرية والاعتداءات التى تعرض لها حسب قوله: «وبعدين حصل ما بينا خلافات تانى قبل أما أنزل إجازة فى 2023 فطلقتها عالواتساب وبعدين اتصالحنا وردتها عالواتساب، وبعدين نزلت إجازة بس كانت بعد فترة طويلة كانت فى سنة 2023 شهر 11 يعنى بعد موضوع الفلوس اللى عدى من 3 سنين، واتفاجأت كمان إن البيت معفن وباين إنه مش قائم على نفس المصاريف اللى أنا ببعتها، فطلبت أعمل قعدة مع عيالى وزوجتى واتفاجأت إن (رحاب) طليقتى مبلغة أهلها وجم إخواتها (أحمد) و(هاني) وأمها (عائشة) ومعاهم شوم وضربونى وقتها بس معملتش محضر، فروحت قعدت عند (إسلام) أخويا لحد ما ظبطت نفسى يومين وسافرت قطر».

وتابع المتهم، فى اعترافاته: «وفضلت فى قطر 6 شهور وبعدين نزلت إجازة كنا فى إبريل 2024، دخلت البيت بتاع مسكن الزوجية ويادوب وصلت البيت بعد 10 دقايق لقيتها كلمت إخواتها (هاني) و(أحمد) وقريبها (محمد.س) ومعاهم ناس تانية ومعاهم شوم وضربونى وعملت محضر ضرب وقتها بس مش معايا رقمه، وبعدين قعدت شهر عند أختى (نعمة) فى مدينة الطيران فى حلوان وسافرت قطر، ومع بداية عام 2025 طلقتها الطلقة الثالثة على الواتساب وتقدمت الطلاق فى بداية 2026، وطول الفترة دى أنا معرفش حاجة عنها ولا عن أولادى وهى رافعة عليا قضايا نفقة وهى كانت فى آخر 2024 أصلاً أو أول 2025 واخدة عليا حكم بالنفقة مبلغ ما يقرب من 20 ألف جنيه تقريبًا ومكنتش بدفعهم».

وواصل قائلاً: «ونزلت إجازة من قطر فى شهر 6 / 2026 وبصراحة أنا كنت معبى من (محمد.س) وأخوات (رحاب)، لأنهم كانوا جابولى بلطجية قبل كدة وضربونى، وكنت شايل برضو من (جنة) بنتى، لأنها كانت بتصورنى فيديو فى البيت وأنا شوفتها قبل كدة بس معرفش كانت بتصورنى فيديوهات وتبعتنى لمين، كنت أبقى مثلاً بتكلم أو بقول حاجة تقوم تصورنى وأنا أخدت بالى والموضوع ده كان فى 2023 أو 2024، فأنا بصراحة دول كنت معبى منهم هما و(رحاب) طليقتي».

مصدر الصورة

النص الكامل لاعترافات مهندس 15 مايو بقتل ابنته و3 من أقارب طليقته

تفاصيل شراء سلاح من الدارك ويب لتنفيذ جريمة 15 مايو

وكشف المتهم تفاصيل وسائله للإعداد للجريمة قائلاً:«فأنا نزلت إجازة يوم 7 / 6 / 2026 وطلبت أقابل (محمد.س) و(أحمد) و(هاني) وطليقتى (رحاب) و(جنة الله) و(عابد) ابنى، وبعت رسالة لـ(عابد) ابنى من أسبوعين على الواتساب طلبت أقابلهم مردش عليا وقتها، وبعدين من أسبوع أنا دخلت على (الدارك ويب) وأتصرفت وعرفت أشترى طبنجة تركى حى ومعاها 120 طلقة حى، وروحت عملت خياطة الجراب فى البنطلون بتاعى عشان أعرف أحط فيها السكينة، وجبت صاروخ كهربا باثنين بطارية، وبعدين بعت تانى لـ(عابد) على الواتساب طلبت إنى أقابله هو وإخواته وأمه وخالانه و(محمد.س) وحماتى برضو، وقلت أقابلهم فى مسكن الزوجية، فى الأول وافق بعد كدة رجع رد عليا قالى نتقابل عند المحامى فأنا رفضت، وبعدين لقيت (محمد.س) بعتلى على الواتساب قالى هما رافضين يتقابلوا فى مسكن الزوجية تعالوا عندى فأنا رفضت».

استطرد قائلاً:«وروحت بليل على الساعة 9 مساء جهزت شنطة سودا حطيت فيها عبايتين حريمى ومعاهم الصاروخ واثنين بطارية احتياطى للصاروخ وشاكوش وجنزير ولسان نقاب واحد، وقفل مفتاح وذخرت الخزنتين كل خزنة بـ 16 طلقة وكان معايا 88 طلقة فى جيب الجاكت بتاعى وحطيت السكينة الكبيرة فى الجراب الخارجى اللى أنا مخيطه فى البنطلون، وروحت على مسكن الزوجية بتاعى فى مجاورة 2 ملقتش حد كلمت (عابد) قالى أنا وماما وإخواتى عند (محمد.س) فأخدت بعضى وروحتلهم على هناك، وطلعت وخبطت بالغلط على باب جار (محمد.س) اللى هو فى الشقة اللى فى وشه وبعدين قالى لأ (محمد.س) فى الشقة اللى فى وشى، وبعدين خبطت على (محمد.س) فتح الباب ودخلنى وشوية ولقيت عيالى الـ 4 طلعوا وقفل علينا ستارة الإنتريه وقعدت مع أولادى شوية، بعد كدة قلتلهم (براءة) و(صفوة) ينزلوا عشان أنا عايز (محمد.س) و(أحمد) و(هاني) و(جنة الله) و(عابد) ابنى وطليقتى (رحاب) نتكلم مع بعض بس هما رفضوا يجيبوا (رحاب) فقعدت معاهم لوحدي».

ورسم المتهم مشهد الجلسة الأخيرة وتوزيع الحاضرين فى الغرفة قبيل إطلاق النار: «وكنت أنا قاعد على آخر كرسى على اليمين وأنت داخل والكرسى اللى على شمالى قاعد عليه (هاني) أخو طليقتى، ويمينى (محمد.س) على الكنبة اللى فى مواجهة الداخل وفى وشى كنبة ثانية قاعد فى مواجهتى (عابد) ابنى وجنبه (جنة الله) بنتى وجنبهم على إيدى الشمال على نفس الكنبة خالهم (أحمد) (أخو طليقتي)، وبعدين قعدنا نتكلم شوية والناس اتكلمت معايا بالأصول مغلطوش فيا بس أنا كنت معبى منهم، وبعدين الكلام جاب بعضه وقالوا مفيش مشكلة إن الأولاد يشوفونى فجات سيرة البيات وأن الأولاد يباتوا عندى يعنى، فـ(محمد.س) قال مفيش مشكلة ده إحنا نتمنى إنهم يحبوا أبوهم ولو هيباتوا عندك تبقى بس تعرفنا عشان يبقى فيه كلام مفتوح ما بينا، وبعدين (هاني) رد قال بس موضوع البيات ده مش وقته نتكلم فيه دلوقتي».

مصدر الصورة

النص الكامل لاعترافات مهندس 15 مايو بقتل ابنته و3 من أقارب طليقته

اعترافات المتهم بإطلاق 16 رصاصة على أقاربه فى نصف دقيقة

واعترف المتهم باللحظات الحاسمة لإطلاق الرصاص وسقوط الضحايا بقوله: «فأنا بصراحة شايل منهم وكلام (هاني) ده استفزنى، طلعت الطبنجة من كمر بنطلونى (أنا كنت حاططها فى كمر بنطلونى من قدام وفيها خزنة فيها 16 طلقة وأنا أصلاً كنت رايح الطبنجة متعمرة ومسحوب فيها طلقة فى الماسورة)، فقمت وقفت وطلعت الطبنجة وضربت (محمد.س) كان قاعد على يمينى 3 أو 4 طلقات متفرقة فى الجسد أول طلقتين أو تلاتة كان لسه عايش ضربت الطلقة الأخيرة فى وشه، وقمت ضارب (جنة الله) طلقة فى دماغها بسبب إنها كانت بتصورنى فى البيت وعشان خطوبتها لأنها كانت مخطوبة لواحد بلطجى وتقريبًا بياخد منى فلوس ولا يليق بيها يعنى، وفى الوقت ده خرجت طلقة بالغلط فى رجل (عابد) بس أنا مكنتش أقصد أضرب (عابد)، وبعدين (أحمد) و(هاني) بيقوموا قمت ضارب (أحمد) طلقتين أو 3، فى وقتها (هاني) سحب السكينة الكبيرة من جنبى اليمين وأنا مخدتش بالى وضربنى بيها قمت ضاربه بالنار 3 طلقات تقريبًا أو 4، هما كانوا 16 طلقة فضلت أضرب نار لحد أما الخزنة خلصت منى فى أقل من نص دقيقة، وكانوا كلهم ماتوا ما عدا (عابد) أخد طلقة فى رجله بالغلط».

واختتم المتهم اعترافاته، أمام النيابة العامة: «وأنا مضروب بالسكينة فى ضهرى من اليمين، طبعا النسوان بدأت تصرخ و(عابد) كتفنى فى الأرض ودخل عليا الجيران، وفى وسط الزحمة معرفش مين أخد المسدس منى وبقى مفيش فى إيدى غير السنجة اللى أخدتها من (هاني) بعد أما ضربته بالنار، وبعدين الشرطة جات وأخدونى واتعرضت على المستشفى لأنى كنت مضروب بالسكينة وبعدين جيت النيابة».

مصدر الصورة

النص الكامل لاعترافات مهندس 15 مايو بقتل ابنته و3 من أقارب طليقته

مصدر الصورة

النص الكامل لاعترافات مهندس 15 مايو بقتل ابنته و3 من أقارب طليقته