آخر الأخبار الأكثر قراءة فيديو

أخبار محليّة

رياضة محليّة

أخبار عالميّة

رياضة عالميّة

إقتصاد

منوّعات

تكنولوجيا

ثقافة

صحّة

علوم

قصص للأطفال

قصص واقعية

عالم الأحلام

آخر الأخبار

«اشتريت الوشاح بـ 1000 جنيه وخدت 250 ألف من خطيبتي».. اعترافات المتهم بانتحال صفة مستشار بمجلس الدولة (مستندات)

منذ

كشف «مصطفى ك.»، عامل بمصنع طوب، المتهم بانتحال صفة مستشار بمجلس الدولة، أمام النيابة العامة، مفاجآت مدوية حول كيفية حصوله على الوشاح القضائى ووسائل تمويل مظاهره الخادعة، حيث أقر المتهم بنص التحقيقات بشرائه وشاح القضاة من أحد عمال المحكمة، قائلاً: «من شهر قولت لعم عصام إنى عايز وشاح علشان يبقى معايا، راح قال لى أنا هعملك وشاح وهجيبه من الوزارة وجابهولى فى خلال يومين وخد منى 1000 جنيه»، مؤكدًا أن هدفه من تملكه كان الاستعراض الاجتماعى: «كنت عايز وشاح خاص بيا علشان أتصور بيه برة المحكمة وماسكة كدة فى إيدى أتفشخر بيه فى البلد... وبدأت أحطه على ترابيزة فى كافيه وأنا خارج علشان الناس تعرف إنى قاضي».

نص اعترافات المتهم بانتحال صفة قاضي بمجلس الدولة أمام النيابة

وفيما يتعلق بكواليس جمع الأموال والإنفاق على استعراض صفته المزيفة، اعترف المتهم فى الجزء الثالث من الاعترافات التى تنشرها «المصرى اليوم» باستغلال تطبيق «سناب شات» للتعرف على إحدى الضحايا وإيهامها برغبته فى الزواج من ابنتها، حيث تمكن من الاستيلاء منها على مبلغ 250 ألف جنيه لشراء هاتفين محمولين أحدهما من طراز «أيفون 17 برو ماكس» بقيمة 100 ألف جنيه، مشيرًا إلى أن صدقة ضبطه جاءت بالصدفة عقب بلاغ من قاطن معه بالشقة يتهمه بالسرقة، مستطردًا: «المباحث فتشوا البيت وطلعوا اللاب والوشاح والكروت والموبايلين... ولما لقوا الوشاح اكتشفوا موضوع التيك توك وسابوا فيديو سرقة الشقة».. وإلى نص أقواله:

يذكر أن محكمة جنايات القاهرة، تنظر اليوم الاثنين، محاكمة المتهم و3 آخرين في القضية.

س: وما الدافع لالتقاط تلك الصور؟

ج: علشان كنت عايز أثبت إنى بشتغل قاضى وأشتهر على التيك توك والناس تتعامل معايا كويس وفعلاً طلبت من الحجاب إنى أتصور جوة غرفة المداولة.

س: وكيف جرى تصويرك؟

ج: أنا طلبت إنى أتصور فى غرفة المداولة ولما طلبت إنى أتصور من الحجاب الثلاثة كانوا بيقولوا لى لما البهوات يخلصوا الأحكام هنفتحلك اوضة المداولة تدخل تتصور فيها وفعلاً اتصورت.

س: ومن منهم تحديدًا؟

ج: كلهم اتفقت معاهم على كده وعلى حسب اليوم الـ هيكون موجود فيه الحاجب لأن فى منهم بيشتغل سبت حد اتنين وفى منهم بيشتغل ثلاث أربع خميس، فـ على حسب اليوم الـ هروح أتصور فيه.

س: وكيف تمكنت من الدخول لغرفة المداولة؟

ج: الحجاب الثلاثة الـ قلت عليهم كان بيدخلونى.

س: وما مقابل ذلك؟

ج: مكنوش بياخدوا حاجة فى وقتها لأنى أصلاً كنت بديهم وبراضيهم علشان لما أطلب منهم حاجة يعملوها.

س: وما مضمون الاتفاق المزمع انعقاده بينكم؟

ج: مكنش فى اتفاق صريح بس أنا كنت براضيهم علشان لو احتجت إنى أتصور فى المداولة أطلب منهم.

س: وما مدى علمهم بصفتك الحقيقية؟

ج: هم كانوا فاكرين إنى محامى وهتعين فى مجلس الدولة بناء على كلامى ليهم.

س: أتمكنت من الوصول لغايتك؟

ج: أيوة حصل وفعلاً اتصورت فى أوضة المداولة.

س: وكم عدد مرات تصويرك داخل غرفة المداولة؟

ج: كتير أوى.

س: وما ظروف تصويرك؟

ج: كنت بتصور جنب القضايا على أساس إن فى الشغل وكدة وكنت بنزل الصور دى على التيك توك علشان أشتهر والناس تتعامل معايا كويس.

س: ومن القائم على تصويرك؟

ج: هم الحجاب الـ كانوا بيصورونى ونفس الكلام اتصورت على المنصة.

س: وما وصف الملابس التى كنت ترتديها وقتئذ؟

ج: أنا كنت بلبس بدلة علشان أبان إنى مستشار وكنت بلبس وشاح القضاة الأحمر ده.

س: ومن أين تحصلت عليه؟

ج: هو كان موجود فى اوضة المداولة الـ فى قاعة 9 وكان متعلق عند الحمام.

س: وكيف قمت بارتدائه؟

ج: بمساعدة عصام وأحمد وبلال.

س: ولِمَ وافقوك ذلك الفعل؟

ج: لأنى كنت براضيهم وكان ليا رصيد عندهم وكنت مفهمهم إنى هتعين فى مجلس الدولة.

س: وما علاقة مجلس الدولة بما ارتكبته من أفعال؟

ج: لأن فى واحد صاحبى قال لى إن مجلس الدولة ده أعلى حاجة وأنا كنت عارف إن وشاح مجلس الدولة لونه مش أحمر ومختلف عن وشاح القضاة بس مكنش عندى طريقة تانية أثبت فيها للناس إنى قاضى.

س: وما مدى تصوير ثمة مقاطع وثقت لاتصافك تلك الصفة؟

ج: فى فيديو اتصورته وأنا فى المداولة ولابس وشاح وطالع على المنصة واتصورت صور كتير فى المداولة وعلى المنصة بالوشاح وجنب القضايا.

س: ومن شاركك تلك الصور؟

ج: الـ أعرفه إنه محامى عرفته من القاعة اسمه صابر ومن المقطم.

س: وما هى كامل بياناته؟

ج: معرفش عنه حاجة وهو مش صاحبى بس اعرف رقم تليفونه.

س: وما رقم هاتفه المحمول؟

ج: (...)

س: وما ملابسات ذلك المقطع وتلك الصور؟

ج: إحنا لبسنا ساعتها الأوشحة الـ موجودة فى غرفة المداولة وطلعنا على المنصة وإحنا لابسين الوشاح علشان نعمل فيديو وننزله على التيك توك.

س: ومتى كان ذلك؟

ج: هو الفيديو ده كان من حوالى 5 شهور ونزلته على طول ساعتها.

س: وما مأربك من ذلك؟

ج: علشان أثبت للناس إنى معايا زمايلى القضاة وبنتصور مع بعض بالوشاح على المنصة وجنبنا قضايا.

س: وما مدى قيامكم بالعبث بتلك القضايا؟

ج: مفيش حد جيه جنب قضية والقضايا كانت ملفوفة بدوبارة بحالتها كدة.

س: وما صلتك بعامل المصعد؟

ج: معرفوش بس فى فيديو صورته وهو بيركب الأسانسير كانى مستشار لأن بلال كان بيصورنى وأنا بدخل المحكمة ناحية أسانسير الـ بيطلع على الدور الثانى والثالث وعم محى عامل الأسانسير لأن بلال كان مفهمه إنى قاضى.

س: من مجمل أقولك، ما الفعل المادى المرتكب من جانبك؟

ج: إنى دخلت أوضة المداولة وطلعت على المنصة ولبست وشاح واتصورت ونزلت الصور والمقاطع على التيك توك بتاعى وانتحلت صفة مستشار فى مجلس الدولة.

س: وما قصدك من تلك الأفعال الإجرامية؟

ج: إن الناس تحترمنى وأبقى تريند والناس فى البلد تتكلم عليا.

س: وما الرابط الخاص بحسابك على برنامج تيك توك؟

ج: اسم الأكونت mostafa والرابط هو https://www.tiktok.com/@maskqhqhabsndnxnfmmfmfmf?r=zs-98cyigyrqln

س: وما صلتك بالمضبوطات السابق عرضها عليك؟

ج: بالنسبة للوشاح والموبايلين والكروت واللاب توب نوع أسوس هم بتاعى وباقى الحاجة مش بتاعى.

س: بشأن الوشاح، كيف تحصلت على ذلك؟

ج: من عم عصام الحاجب.

س: وكيف جرى الاتفاق بينكما؟

ج: هم من شهر كده قولت لعم عصام إنى عايز وشاح علشان يبقى معايا راح قال لى أنا هعملك وشاح وهجيبه من الوزارة وجابهولى فى خلال يومين وخد منى 1000 جنيه وفعلاً استلمت الوشاح الـ اتمسك معايا ده وهو عارف إنى مش قاضى.

س: وما سبب سعيك امتلاك وشاح خاص بك؟

ج: أنا كنت عايز وشاح خاص بيا علشان أتصور بيه برة المحكمة وماسكة كدة فى إيدى أتفشخر بيه فى البلد علشان بأكد للناس إنى قاضى، وبدأت أحطه مثلاً على تربيزة فى كافية وأنا خارج علشان الناس تعرف إنى قاضى وده كان هدفى.

س: أقمت باستعمال الصفة القضائية المدعاة؟

ج: هو أخرى بس فى الكافية لكن معملتش حاجة تانى.

س: وماذا عن الهاتفين المحمولين؟

ج: هم بتوعى.

س: ومن أين لك بهما رغم معاناتك من قتر فى الرزق؟

ج: الموبايل أيفون 17 برو ماكس لونه أورانج الـ هو اتمسك معايا ده بـ 100 ألف وده جبته بفلوس مستلفها من حنان والموبايل الثانى 17 برو ماكس أبيض حبيته بـ 68 ألف جنيه وفلوسه جيبتها من بيع موبايلى القديم وكان عندى مكنة بعتها.

س: وما علاقتك بالمدعوة حنان؟

ج: اتعرفت عليها على السناب شات وكانت بتكلمنى على أساس إنى قاضى وقابلتها واتعرفت على رحمة بنتها وقررت أخطبها وخدت من حنان 250 ألف.

س: وما الداعى لذلك؟

ج: أنا خدت منها الفلوس دى سلف علشان اشترى شقة وقلتلها إن أخويا عايز الفلوس بس أنا كنت هجيب شقة بيهم.

س: أقمت بشراء تلك الشقة؟

ج: لا.

س: وما الحائل دون شرائك للشقة؟

ج: لأن مفيش شقة بـ 250 ألف ونويت أرجع لها الفلوس بس ملحقتش واتمسكت.

س: وما الذى دعاها إلى تسليمك ذلك المبلغ المالى؟

ج: هى وثقت فيا إنى مستشار.

س: وكيف قمت باستلام ذلك المبلغ المالى؟

ج: هى أديتنى الفلوس كاش من أسبوعين.

س: وما مدى ملاءتك المالية؟

ج: أنا كل الـ حيلتى 55 ألف جنيه على محفظة فودافون كاش ودة بتاعت حنان وأنا مستعد أتنازل عن الفلوس دى والموبايلين لصالح حنان علشان أرجع لها فلوسها وأنا مكسبتش أى فلوس من التيك توك وأنا منصبتش على حد وخدت منه فلوس علشان أخلص له حاجة وأنا عملت كل ده منظرة.

س: وما صلتك بباقى المجنى عليهم؟

ج: ماليش أى علاقة بصباح ولا اعرفها ولا عمرى شفتها ومنصبتش عليها فى حاجة.

س: وكيف تم ضبطك؟

ج: يوم الجمعة الـ فاتت الساعة 5 لقيت رحمة بتكلمنى بتقولى الحقنى المباحث فى البيت رحت عليها وبعد كدة لقيت ميكروباص المباحث دخل علينا وخدونى على البيت فتشوا البيت وطلعوا اللاب والوشاح والكروت والموبايلين وهم راحوا لحماتى وخطيبتى علشان كانوا عايزين يمسكونى أنا لأن فى واحد بلدياتى اسمه محمود خميس قاعد معايا فى الشقة عمل فيديو إنى سرقت شقته الـ إحنا قاعدين فيها ودة محصلش والشرطة كانوا عايزين يمسكونى علشان الفيديو ولما لقوا الوشاح اكتشفوا موضوع التيك توك وسابوا فيديو محمود خميس.

ملحوظة: حيث قمنا بالاطلاع على الهاتف المحمول ماركة أيفون 17 أبيض اللون وبفرضه على الماثل قرر بملكيته له وقرر بأن الرقم السرى هو (...) وبفحص ملف الصور تلاحظ لنا وجود العديد من الصور الفوتوغرافية الملتقطة والخاصة بالمتهم الماثل مرتدياً وشاح القضاء داخل غرفة المداولة وعلى منصة المحكمة تمت الملحوظة.

س: بم تعلل ما عرض عليك سالفًا؟

ج: دى الصور الـ قلت لحضرتك عليها وكان دا فى قاعة 9 فى محكمة شمال القاهرة واتصورتها بمساعدة الحجاب فى القاعة واتصورتها على مدار السنة دى والسنة الـ فاتت.

ملحوظة: باستكمال فحص الهاتف المحمول تلاحظ لنا وجود مقطع مرئى مدته 31 ثانية مؤرخ 2026/6/17 يظهر به المتهم الماثل داخل إحدى غرف المداولة وتلاحظ لنا وجود وشاح القضاء على منضدة أمام المتهم وبعض القضايا وسلاح نارى مسدس يقوم المتهم بوضعه بجانبه وبفرضه على المتهم الماثل تمت الملحوظة.

ملحوظة: حيث تلاحظ وجود صور فوتوغرافية على الهاتف المحمول الخاص بالمتهم مرتدياً وشاح القضاء رفقة شخص آخر وذلك داخل غرفة المداولة وعلى منصة القضاء تمت الملحوظة.

س: بم تفسر تلك الصور؟

ج: دى الصور الـ اتصورتها مع صابر المحامى الـ اتعرفت عليه فى المحكمة.

س: وما هى بياناته؟

ج: زى ما قلت لحضرتك كل اعرفه إن اسمه صابر ومحامى ومن المقطم ومعرفش عنه حاجة ثانية.

ملحوظة: حيث قمنا بالاطلاع على تطبيق الواتساب الخاص بالمتهم على هاتفه المحمول وتبين لنا وجود رقم مسجل باسم صابر بيه نيابة مربوط برقم (..) وبفحص الصورة على ذلك الحساب تبين تطابقها مع صورته رفقة المتهم المشار إليها سلفاً تمت الملحوظة.

س: بم تعلل ما سبق عرضه عليك؟

ج: هو أنا الـ فى الفيديو والـ كان بيصورنى بلال الحاجب فى قاعة 9 فى محكمة شمال القاهرة والقضايا دى قضايا المحكمة ومجتش جنبها والسلاح بايظ وصوت والوشاح ده وشاح القضاة.