المنتج محمد رشيدي: كنت أول من نادى بضرورة وجود نظام لنشر إيرادات الأفلام

طالب المنتج محمد رشيدي ضرورة تنظيم ملف إيرادات الأفلام ، مؤكدًا أهمية وجود نظام واضح يضمن الشفافية في إعلان أرقام شباك التذاكر.

وكتب عبر حسابه على "فيس بوك": "على مدار الأسابيع اللى فاتت التزمت الصمت فى أكتر موضوع أنا كنت بحاربه، وهو الإيرادات، وكنت أول واحد اتكلمت على إنه لازم وجود سيستم للإيرادات، واتهمونى كتير اوى إنى بفتعل مشاكل وصدامى وببوظ الصناعة وهرى كتير اوى".

وتابع رشيدي: "لدرجة إنى بدأت اتحارب فى شغلى من ناس سموا نفسهم كبار (الشغلانة) وأنا مع كامل احترامى الشديد ليهم شايفهم كبار فعلا (بس فى السن) والناس دى وصلت انها تكلم كل ممثل هيشتغل معايا قبل ما يصور يحاولوا، يقنعوه ويخوفوه انه لو اشتغل معايا هيدمروا ايراداته وانهم هم المتحكمين فى الإيرادات والرزق (استغفر الله العظيم)، وحق الله كل الممثلين طلعوا رجالة و صوروا ولا ركزوا فى الكلام الفاضى ده ".

مصدر الصورة
تعليق محمد رشيدي على ايرادات الافلام

وأضاف: "وكان رد الله اقوى بكتير اوى فينزلوا بفيلمين قصاد بعض والفيلمين يتزور ايراداتهم لانهم ببساطه مش هينفع ابدا يعترفوا انه مش بايديهم، وده اللى صوتى اتنبح وبقوله من اول يوم فى الشغلانه دى".

وأستكمل: "عايز أأكد على حاجتين مهمين جدا ان الممثلين ملهومش أى ذنب فأى ايرادات وصلتلهم غلط، والأهم انى للأسف حاولت كتير اسكت ولكن زى ما انتوا عارفين الطبع يغلب التطبع وانا مبعرفش اسكت عن الحق خصوصا لما الكدب بيزيد مبستحملش ودى الايرادات الأصليه المظبوطه وأى حاجة غير كده هرى وعلى مسئوليتى الشخصيه ولو فى فروق هتبقى فروق تافهه جدا لا تذكر".

وتابع: "اللى عايز يفوق وضميره يصحى بما يرضى الله ربنا يجازيه خير، واللى غروره ومرضه النفسى هيفضل سايقه ربنا يهديه ويشفيه، رجاء أخير بكل ود واحترام اتقوا الله وكل واحد يبص فى ورقته والرزق بايد ربنا فقط ومحدش يدعى الالوهية على الأرض".

ونشر المنتج محمد رشيدي إيرادات السينما المصرية أمس الأربعاء من موقع film yard حيث تصدر فيلم الجواهرجي القائمة بإيرادات بلغت مليوناً و770 الفاً و262 جنيهاً وحقق فيلم خلي باكل من نفسك المركز الثاني بإيرادات بلغت مليوناً و660 الفاً و689 جنيهاً، وجاء فيلم صقر وكناريا بالمركز الثالث بإيرادات بلغت 942 الفاً و643 جنيهاً.

مصدر الصورة
ايرادات الافلام