تعاون الملحن نادر نور مع النجم عمرو دياب، بعد ابتعاده لسنوات عن الساحة الفنية، فى ألبوم «حبيتِك» الذى ينافس به الهضبة فى موسم صيف 2026، وقدما أغنية «جيتلك» من كلمات رزام وألحان نادر وتوزيع عادل حقى.

من جانبه كتب نادر نور عبر «فيسبوك»: «النهاردة اليوم الأهم فى مشوارى، جيتلك مش مجرد أغنية دى بالنسبة لى شهادة ميلاد جديدة رجعتنى أتنفس من جديد، ألف شكر لمعالى المستشار تركى آل الشيخ على إنسانيتك ودعمك المستمر ليا وللفن المصري».

مصدر الصورة

وأضاف: «ألف شكر للميجا ستار عمرو دياب على الفرصة دى، الكلام عاجز عن وصف إحساسى بالرجوع لألبومك من تانى، ألف شكر لكل أصدقائى وزمايلى ولكل الناس اللى عندى على السوشيال ميديا اللى دعمونى فى أزمتى، والوقت الصعب اللى مريت بيه».

نادر نور يشكو من ابتعاده عن الوسط الفني

كان نادر نور، كشف قبل أسابيع، عن معاناته خلال الفترة الأخيرة متحدثًا عن ابتعاده عن الساحة الغنائية والصعوبات التى واجهته فى محاولات العودة إلى الوسط الفنى خلال السنوات الماضية.

وكتب «نور» عبر حسابه الرسمى على «فيسبوك»: «باعتذر لكل الناس اللى بتبعتلى كلمات اغانى من فضلكم متبعتوش تانى.. معنديش مشاريع شغال عليها ولا نجوم بتسمع منى اغانى ولا عندى حاجة أقدر اساعدك بيها لأنى ببساطة محتاج اللى يساعدني».

وأضاف: «وللناس اللى بتتهمنى بالكسل والتقصير أنا فعلا بعدت فترة لأسباب شخصية وباحاول أرجع من 3 سنين ومش عارف.. مسيبتش باب مخبطتش عليه.. فقدت التواصل مع الاغلبية العظمى داخل الوسط الغنائى منهم نجوم اشتغلت ونجحت معاهم ومنهم اللى بحاول اشتغل معاه للمرة الأولى ومنهم اللى عشرة عمر ومشوارنا بدأناه مع بعض واحلام حلمناها ونجاحات حققناها سوا واللى بيرد على التليفون مرة مبيردش تانى وبقيت احس بالرفض وعدم التقبل وانا مش متعود ازن على حد أو اطلب الحاجة أكتر من مرة بشكل يقلل منى ومن احترامى لنفسى بعد كل اللى قدمته حتى لو كان قليل فهو كبير من وجهة نظري».

واختتم: «أخيراً معنديش مشاكل مع حد ولا باكتب الكلام ده لكسب تعاطف حد وكل الاحترام والتوفيق لزملائى انا مش زعلان من حد.. وآسف على الاطالة».