عزمته على حمام وملوخية.. منة القيعي تحكي كواليس لقاءها بـ كريستيان بيل على متن طائرة أسوان

مصدر الصورة

كشفت الشاعرة الغنائية منة القيعي عن موقف طريف جمعها مصادفة بالنجم العالمي كريستيان بيل خلال رحلة عودتها من أسوان إلى القاهرة، وذلك عبر حسابها الرسمي على موقع التواصل الاجتماعي "فيسبوك".

وروت منة القصة قائلة: "فيه حكاية مش عارفة هتصدقوني فيها ولا لأ.. مرة كنت أنا ويوسف وصحابنا راجعين من أسوان، ولقينا على الطيارة كريستيان بيل، وكان نايم".

وتابعت: "في الأول شكيت وقلت يمكن شبهه، بس رجعت الكرسي ورا لحد ما صاحبتي طلعت بعدي وفضلت تنادي علي من أول الطيارة: إلحقي مين هنا!.. وكانت واقفة قدامه وهو نايم".

وأضافت: "قابلنا شخصا مصريا غالبا كان مرافقا له، وطلب منا نهدي صوتنا علشان ما نصحيهوش، وساعتها تأكدنا إنه هو فعلا، وقال لنا إنه بيحب ييجي مصر كتير يقضي إجازات مع عيلته في هدوء ومن غير إزعاج".

وتابعت منة: "طلبنا نتصور معاه، بس الراجل رفض علشان لو الناس عرفت هيحصل زحمة، وإحنا كنا شايفين إنها فرصة عمر ومش هتتكرر، ففضلنا طول الرحلة نحاول نكسب ود المرافق من غير ما نكون أوفر".

واستكملت: "فضلت أسأله عن رأيه في مصر، وقال إنه بيحبها جدا وبيموت في الأكل المصري، وهنا جاتلي الفكرة وقلت له: ممكن تقوله إن مامتي عازماه هو ومراته وأولاده على حمام وملوخية، تجربة مصرية أوريچينال!".

وواصلت مازحة: "كنت بقوله كمان إننا زملاء في الوسط وأنا شاعرة، على طريقة الفنانة غادة إبراهيم لما قالت عن Leonardo DiCaprio "الزميل ليو".

واختتمت: "وصلنا القاهرة، ونزل هو وعيلته، وإحنا بنجري وراهم يمكن يبتسم أو يدينا فرصة نسلم عليه، لكنه كان بيتجنب أي تواصل بصري بشكل مؤدب جدا، والمفاجأة إن محدش في الطيارة كان واخد باله خالص! لحد ما وصلنا السير.. والناس بدأت تتجمع حوالين يوسف وخالد جواد علشان يتصوروا معاهم".

يذكر أن من أبرز أفلام الفنان العالمي كريستيان بيل: "Batman Begins، Reign of Fire، The Portrait of a Lady"، وقد فاز بجائزة الأوسكار عام 2011 عن فيلم "The Fighter".