ركائز السياحة أربعة، الحرية، المواصلات العامة، الطواليطات العمومية والبيرة، وللأسف تاوحدة منهم مكاينة في المغرب .

مصدر الصورة

محمد سقراط-كود///

ركائز السياحة أربعة، الحرية، المواصلات العامة، الطواليطات العمومية والبيرة، وللأسف تاوحدة منهم مكاينة في المغرب، الحرية كاينة شكلية وبلا قيمة وغير محمية بالقانون والدستور، الدولة دايرة راسها وصية على الدين وحامية لله وكتحصيل حاصل كتولي مباشرة قامعة للحريات، المواصلات العمومية خارية وغير متواجدة في بلايص كثيرة والتنقل من مدينة لمدينة يقدر ياخد ليك نهار واخا المسافة قصيرة، مثلا من الرباط لصويرة لي عي مدينة سياحية مكتوصلهاش الطريق السيار ومواصلهاش التران، وعندها محطة كتقلب بريحة البول، ومع ذلك كتبقى محظوظة مقارنة بمدينة بحال الحسيمة لي فيها اجمل شواطئ المغرب، ومدينة متوسطية لاتقل جمالا على أي مدينة سياحية في الضفة الأخرى.

الطواليط هذا موشكيل كبير بتجربتي الشخصية راه المدن السياحية ديال بصح غير كتحبسك البولة كتلقى طواليط حداك، في الپاركات في الجرادي في الساحات قرب المحطات، الطواليط كاين في كل قنت، هنا الى شداتك البولة إما تكون هرگاوي وتبولها عند اقرب حيط او شجرة أو تبغي تكون متمدن وغادي يجيك الحجر في الكلاوي ونتا باقي كتدور تقلب على فين تبول حتى يعطف عليك شي مول القهوة، الطاروات دالزبل كذلك كتبغي تلوح شي حاجة ممحتاجش تقلب غير دول وجهك غادي تلقى طارو، وداكشي بالانواع والاشكال والألوان، والبلدان واخا كيدخلوها ملايين السياح وبالليل كولشي ناشط وسكران الصباح تفيق تلقى كولشي نقي كيشعل، الشوارع مسيقة مع النبوري

وطبعا البيرة وتنوعها وحرية شربها في البار والقهوة والمطعم والمخبزة والصاكا والبحر والطروطوار بحال الصبليون، المغرب أولا مزير في قضية الشراب كأي بلاد دينها الرسمي الإسلام، وهادشي أي خلى منتوج البيرة المغربي فقير وغير منافس وغالي وغير بوحدو في السوق، دخل لأي بلاصة في المغرب من ارخصهم لأغلاهم غادي تلقى الى كثرو خمسة دالانواع والپريسيون قليل الى شبه نادر، بينما لبنان غير بلاد صغيرة والحرب والازمة والمشاكل وانهيار الاقتصاد وعندهم عشرات أنواع البيرة، بلا منهدرو على فرنسا وسبانيا لي أي محل تلقى فيه أنواع خاصين ديالو مكاينينش في بلايص خرى، المغرب معندو أهرام معندو مكة لي مليار مسلم كيحلموا يزوروها على الأقل مرة في حياتهم، معندو شي مدن مستقبلية مشهورة بالتيك، باغي السياحة بجوج قرودة في جامع لفنا ورياض، وبونحوغ مادام بونجوغ موسيو، راه مايمكنش نستافدو من اشعاع كاس العالم بلا حرية ونشاط وظروف إنسانية وهادشي راه ساهل ماشي شي حاجة صعيبة نصوص قانونية خاصها ااشجاعة باش تغير.