عضو مجلس مقاطعة الحي الحسني كينتقد ميزانية 11 مليار لإصلاح محطة ولاد زيان فاجتماع عمالة كاز:11 مليار نبنيو بها مدينة جديدة .

مصدر الصورة

أميمة عطية – كود كازا ///

عرفت الدورة العادية ديال مجلس عمالة الدار البيضاء لي تعقدات لبارح الاثنين 8 يونيو 2026، نقاش ساخن حول عدد من المشاريع، من بينها مشروع إعادة تهيئة المحطة الطرقية أولاد زيان لي باقي مشافش ضو حتال دابا برغم من أهمية هاد لمحطة فكازا ولمغرب كامل.

وحسب ما أكدو مصدر ل ” كود” فنقاش كان كبير بخصوص هاد لمشروع بحيت أنه تم انتقاد لغلاف لمالي لكبير لي تخصص لإصلاح هاد لمحطة .

وفهاد السياق، عبر مصطفى منظور، عضو مجلس مقاطعة الحي الحسني، على استغرابو من المبلغ اللي تم رصدو للمشروع واللي كيقدر بحوالي 11 مليار سنتيم ، وكال بلي المجلس سبق وساهم فإصلاح المحطة، واليوم كيتعاود الحديث على تمويل جديد لنفس المشروع، الشي اللي طرح عندو تساؤلات حول الأولويات.

منضور فهاد دورة ، تساءل على مدى أهمية صرف هاد المبلغ الكبير، واعتابر أنو يمكن يتوظف فمشاريع أخرى أقرب لحاجيات الساكنة لبيضاوية ، وكال بلهجة نقدية: “واش الفلوس ما عدنا ما نديرو بها؟” وزاد وضح بلي هاد 11 مليار راه تقدر تضارب بيها مدينة جديدة .

ومن جهة أخرا ، وبخصوص لجدل لي مازال كتعرفو محطة ولاد زياد بحكم أنها اكبر محطة طرقية في لمغرب ، سبق وأكد أحمد بريجة، النائب الأول لرئيس مجلس عمالة الدار البيضاء، في تصريحو ل ” كود” في دورة ماي لعادية لجماعة كازا ، أن المحطة الطرقية الجديدة قربات تسالي وغادي تتحل في الشهرين الجايين ،ب كلفة مالية وفلوس صحية وصلات حوالي 10 مليار سنتيم.

وزاد ضاف ، فتصريحاتو لي فاتت أن المشروع غادي يجي بتحديث شامل، من خلال نظام رقمي حديث، وتنظيم جديد للدخول والخروج، ورفع عدد الأرصفة لـ60 رصيف، إضافة لإعادة تهيئة محيط المحطة، بما فيه إزالة السوق العشوائي وإصلاح القنطرة المجاورة.

وفي انتظار لكازاويين اشوفو نتائج الإصلاحات ولفلوس لي تخسرات على هاد لمحطة ، لي دايما كانت فيها مشاكل متعددة باقي الموضوع خالق نقاش حول أولويات صرف الميزانية، باعتبارها أهم مشروع كتعرفو الجهة كاملة .