بنت الباشا، فاطمة الزهراء المنصوري، منسقة البام، الوزيرة العمدة…، وأخيرا خرجات تكلم ف حوار مع يوتوبر (حيث مقدراتش تواجه مع الصحافة اللي سولاتها من “برلمان” و”لوديسك” ….)، باش توضح حقيقة التحاق لقجع للبام وترد على شبهات ملف أراضي تسلطانت.

المنصوري خرجات فـ”طويل تالك”، قالت بلي فحوار مع فوزي لقجع هادي كثر من عام باش يدخل للبام. واضافت باللي لقجع “حداثي وكيشبه لينا فالتصور”.

هاد الكلام كيبين أن الحزب كيقلب غير على شي مظلة ديال كفاءة حقيقية يغطي بيها العورات والشبهات لي غارقين فيها أغلب القيادات ديالو اللي فرشاتها تحقيقات صحفية وتسريبات جبروت.

شكليا، البرومو ديال الحوار للي فيه مقطع كتهضر فيه المنصوري على لقجع، كيوضح بلي بنت الباشا بانت مرتبكة، وحركاتها وصوتها كيدل بلي “ضعيفة تواصليا” ومعندهاش اليقينيات والثقة ف كلامها.

نرجعو لمضمون كلامها، واش بصح لقجع كيشبه ليهم ف البام، هادي اخر نكتة ممكن يتيقها اي واحد موضوعي متتبع للشأن السياسي والبرلماني ف بلادنا. شتان بين لقجع والمنصوري بعدا، عاد نقارنو بين لقجع وناس د البام (للي ماشي كلهم مكفسين).

لقجع الحداثي – كيف وصفاتو المنصوري-، راه حداثي فعلا ولكن مسارو عامر بالإنجازات والنتائج والأرقام كتوضح، ماشي بحال حزبك يا المنصوري للي غارق ف شبهات ومحاكمات وفضايح، البام بحال شي قرع فينما ضربتيه كيسيل دمو.

لقجع كيخدم. كيبدا نهارو مع السبعة ديال الصباح ويقدر يسالي مع الثمنية ديال العشية. وصارم فخدمتو وقرارتو، وماشي بحال قيادات البام اللي غارقين حتى للودنين فملفات الفساد، والمتابعات القضائية، ومحاكمات “إسكوبار الصحراء” اللي بهدلات الحزب وإغلاق الحدود فوجه الامين العام الجهوي للبام فكازا إمبراطور الفروماج …..

المفارقة كاينا فالمعقول والانضباط؛ لقجع رجل “العمل” بامتياز، كيدخل لمكتبو باش يخدم الملفات ويقاد البرامج، وعمرو تغيب على شي جلسة عمومية فالبرلمان ولا اجتماع لجنة. فالوقت اللي الوزيرة المنصوري ديما غايبة، سواء ف اللجان البرلمانية أو الجلسات العمومية.

لقجع خدام فالتيران ومركز على أوراش الدولة الكبرى، واقف على الصغيرة والكبيرة، وف اخر حضور له ف لجنة برلمانية بمجلس المستشارين راه تشكا من أمثالك يا المنصوري، لقجع قالها بوضوح براكا من الشكاوى والاستغلال السياسي الضيق للبرامج الاجتماعية.

لقجع يلا كان كيشبه لشي حد ولا قريب لتصور معين، فهو كيشبه للروح الأصلية ديال الحركة لكل الديمقراطيين بفكرها التأسيسي النقي اللي كان باغي يجمع كفاءات بالصح لخدمة لبلاد. أما “بام” ديال دبا، فراه نخبه مأزومة والداعمين ديالو فالانتخابات فراهم ف عكاشة وكيتحاكم.