حرب التزكيات فالبام فإقليم ورزازات سالات: إيمان لماوي حصلت على التزكية بعدما دارو عليها أعيان وصحاب الفلوس حروب كثيرة .

مصدر الصورة

كود ورزازات//

حرب التزكيات للانتخابات الجايا، مستمرة، فحزب الأصالة والمعاصرة، ومن ورزازات تحسم فواحد الخلاف كبير وصراعات كتبات عليها گود.

وفد كبير من المكتب السياسي لحزب البام، الحزب للي كيرشح راسو لقيادة حكومة المونديال، وللي متكون من كل من سمير كودار، رئيس قطب التنظيم فالحزب، وأحمد تويزي، رئيس الفريق فمجلس النواب، والمليادير العربي لمحرشي، عضو المكتب السياسي، وهشام المهاجري، عضو المكتب السياسي، وآخرون انتقلوا كلهم لورزازات فدرجة حرارة كبيرة فقط عند الملياديرة، بنت المليادير والبرلماني السابق، إيمان لماوي باش يطمئنوها ويخبروها، بللي راها هي للي غا تحصل على تزكية حزب الأصالة والمعاصرة فالدائرة التشريعية لورزازات لخوض انتخابات شتنبر 2026.

هاد الوفد السياسي الكبير ما قدمش للرأي العام المحلي فورزازات أي محضر يخص مداولات اللجنة الوطنية للانتخابات للي من الملزم يشكلها الحزب طبقا للقانون، ولم يقدم أي توضيحات حول مآل طلبات الترشيح للي تقدمو بها باقي المنافسين للحصول على تزكية حزب البام.

الناس جاو من مراكش، معقل قيادة الحزب، وعطاو التزكية لإيمان لماوي، هكذا بدون مقدمات، ومريضنا ما عندو باس.

هادي أسابيع كانت “كود” سباقة لكشف ما يقع بورزازات ومحاولة جهة معينة إقصاء البرلمانية الحالية المهندسة إيمان لماوي من التزكية، وكانت راجت أخبار عن سعي بعض سماسرة الانتخابات منح تزكية دائرة ورزازات لفائدة مقاول معروف كان حصل مؤخرا على صفقة شراء فندق بالمدينة. وبعد فشل هذه المحاولة، قامت نفس الجهات بمحاولة تزكية مقاول آخر عضو فحزب التجمع الوطني للأحرار، قبل ما تفجر “كود” هاد القضية للي خلقات أزمات فباقي أقاليم جهة درعة تافيلالت، وهاد الشي دفع قيادة البام إلى تجميد دراسة طلبات التزكيات فهاد الجهة بعدما كتشفت أن هناك مجموعة من سماسرة التزكيات بغاو يقصيو المناضلين، خاصة الشباب والنساء والكفاءات ديال الحزب، باش يجيبو فبلايصهم أصحاب الشكارة ما معروفينش وأغلبهم من أحزاب أخرى.

الوفد السياسي الكبير ديال البام للي مشا لورزازات ما قدرش يزور الأقاليم الأربعة الأخرى بجهة درعة تافيلالت بعدما عرفو بللي كاينة أزمة حقيقية خاصة فأقاليم ميدلت وتنغير وزاكورة.

والغريب فزيارة هاد الوفد لورزازات هو منح التزكية لإيمان لماوي بدون استشارة المنسق الجهوي للحزب مولاي مصطفى العمري للي كتقول مصادر بللي ما بقا عندو غراض مادام ضامن التزكية مرة أخرى باش يرشح ولدو مولاي عبد الله العمري.

منسقة القيادة الجماعية فاطمة الزهراء المنصوري للي كتواجد حاليا فالسعودية لأداء مناسك الحج، متبعة كل شيء صغيرة وكبيرة وف تنسيق مستمر مع رئيس قطب التنظيم.