شوبير: استقبال برشلونة للأهلي كان رائعًا.. وحسام حسن منح حمزة عبد الكريم فرصة مهمة

مصدر الصورة

قال الإعلامي أحمد شوبير إن الأهلي حظي باستقبال جيد لدى وصوله إلى برشلونة، مشيرًا إلى أهمية تقديم مباراة قوية أمام الفريق الإسباني، رغم كونها ودية.

وقال شوبير عبر إذاعة «أون سبورت إف إم»: «الأهلي امبارح حظي باستقبال جيد في برشلونة وشعار النادي كان موجود، لكن المهم دلوقتي إننا نعمل مباراة حلوة».

وأردف: «صحيح هو ماتش ودي، بس الأهلي بقى نادي كبير له اسمه، والكورة في مصر بقت في وضع حلو، وبالتالي من المهم إن الماتش يبقى جيد».

وتطرق شوبير إلى حمزة عبد الكريم، لاعب الأهلي الشاب، مشيدًا بحصوله على فرصة للمشاركة مع برشلونة، مؤكدًا أن قرار حسام حسن بمنحه الفرصة مع منتخب مصر كان له تأثير إيجابي على اللاعب.

وأضاف: «إحنا دلوقتي كمان هنشوف حمزة عبد الكريم اللي خد فرصة مع برشلونة، فاكرين لما حسام حسن خد حمزة في كأس العالم والدنيا قامت مقعدتش، لكن حسام حسن كان عنده الجرأة والشجاعة، ومؤكد ده فرق مع حمزة في برشلونة».

وتابع: «أنا نفسي إن المدربين في مصر يبقى عندهم المبادرة دي وندي فرصة لولادنا الصغيرين».

وانتقد شوبير سياسة بعض الأندية التي تعتمد على التعاقد مع عدد كبير من اللاعبين خلال فترات الانتقالات، قائلًا: «في أندية بتروح تجيب 8 لعيبة كل موسم انتقالات، يعني بعد 3 مواسم بيبقوا 24 لعيب، وتلاقي نفسك مجبر تمشي اللي إنت جبته، حتى تلاقي اللي كان بيقولك هات اللاعب ده يرجع يقولك مشيه».

وأشار إلى تجربة الأهلي في الألعاب الأخرى، موضحًا: «إحنا الحمد لله كنا من أول اللي ألقينا الضوء على حمزة عبد الكريم، وأنا بتكلم على كل الألعاب مش كورة بس».

وأردف: «عندك في الأهلي الراجل الأجنبي في الكرة الطائرة طلع لعيبة صغيرة بدلًا من الاعتماد على إن كل لعيب حلو أروح أشتريه، والولاد كسروا الدنيا».

واختتم شوبير: «أنا مش هتكلم في الكورة بس، إحنا عايزين الصورة الجميلة تكتمل».