كشفت الفنانة نادية الجندي، كواليس تصوير فيلم «مهمة في تل أبيب»، مشيرة إلى أن جانبًا كبيرًا من أحداث العمل جرى تصويره خارج مصر، كما تحدثت عن ردود فعل الجمهور وقت عرض الفيلم في دور السينما.

وقالت نادية الجندي، خلال مداخلة هاتفية مع الإعلامية نهال طايل في برنامج «تفاصيل» المذاع عبر قناة «صدى البلد»: «إحنا صورنا الفيلم في باريس وفي جنيف، وفي سويسرا، أخدنا جزء كبير منه جدًا في الخارج، وكل العاملين في هذا العمل كانوا على أعلى مستوى وسجلنا اللحظات دي بعظمة، وقد إيه كان له تأثير العمل ده، لدرجة إنه عايش لغاية النهارده والناس بتتفرج عليه بتستمتع بيه».

وتابعت نادية الجندي: «أنا كنت بنزل عشان أشوف رد فعل الناس، والجمهور، مع الناس، كنت بشوفه مع الناس، كل يوم أروح أتخفى في دور العرض وأحضر وأشوف، وكنت ببقى سعيدة سعادة بإحساس الناس وبالطاقة الحماسية اللي عند الناس ساعة ما يشوفوا إن قد إيه المخابرات المصرية بتنتصر على المخابرات الإسرائيلية وبينقذوا البطلة».

وأوضحت نادية الجندي: «كنت بتنكر وأنا نازلة العرض الخاص للفيلم، ولما كان بيتقبض عليا في أحداث الفيلم كنت بشوف حالات إغماء من الجمهور، ولما في النهاية المخابرات المصرية أنقذوني في نهاية العمل، كان تصفيق حاد من الناس لدرجة إن صالة العرض كانت بتتكسر».

وفيلم مهمة في تل أبيب، عرض عام 1992، بطولة نادية الجندي وكمال الشناوي ومحمد مختار وسعيد عبد الغني ويوسف فوزي، تأليف بشير الديك وإخراج نادر جلال.