كشف المخرج خضر محمد حضر، طليق ياسمين أبو النجا، ابنة الفنانة نجلاء فتحي، تفاصيل جديدة بشأن حياتهما خلال السنوات الأخيرة، متحدثًا عن فترة زواجهما وانفصالهما، وعلاقتهما بعد الطلاق، إلى جانب تفاصيل رواها عن الحالة الصحية لياسمين والإجراء الطبي الذي خضعت له قبل وفاتها.

وقال خضر محمد حضر، عبر حسابه على موقع «فيسبوك»: «على فكرة أنا بعرف أرد كويس وبعرف أحكي كويس.. يعني أنا مستعد أحكيلكم عادي عن أسرار بيوتنا اللي محدش يعرفها غير المقربين مننا».

وتحدث عن علاقته بياسمين بعد إنجابهما، قائلًا: «ممكن أحكيلكم عن علاقتي الزوجية أنا وياسمين من بعد ما خلفنا، ومن ساعة ما دكاترة فرنسا حذرونا من الحمل مرة تانية».

وأضاف: «وممكن أحكيلكم عن بداية النهاية من سبتمبر 2024 بعد 18 سنة جواز، وممكن أحكيلكم مين أجبرني أنا وياسمين على الطلاق بالعافية وإيه السبب، وليه ياسمين ماعرفتش تقف قدام القوة القهرية دي».

وتابع: «وممكن أحكيلكم مين أجبرها تسيب البيت 4 شهور وماترجعش غير لما نتطلق، وبقيت أنا عايش لوحدي 4 شهور في بيتنا، وبنتي عايشة 4 شهور مع أمي، وهي عايشة 4 شهور إجباري في بيت تالت».

واستكمل حديثه عن تلك الفترة، قائلًا: «وممكن أحكيلكم أنا وياسمين كنا بنتقابل في الشارع اللي ورا بيتهم في السر إزاي عشان ترجع البيت، وفشلنا برضه بسبب القوة القهرية دي».

وأشار خضر إلى استمرار علاقته بياسمين بعد الطلاق، موضحًا: «وممكن أحكيلكم عن صداقتي أنا وياسمين وعلاقتنا بعد الطلاق، لما رجعت بيتنا وأنا مشيت وقعدت جنب أمي عشان كانت بتتعالج من السرطان».

وأضاف: «وممكن أحكيلكم عن مكالماتنا أنا وياسمين ورسايلنا كل يوم وزياراتنا كل أسبوع».

وتطرق طليق ياسمين أبو النجا إلى زواجه بعد الانفصال، قائلًا: «وممكن أحكيلكم أنا ليه اتجوزت بعد الانفصال بـ13 شهر وعملت فرح، بالرغم إن مراتي ماكانش فارق معاها نعمل فرح، وياسمين كانت على علم، وزين حضرت الفرح بدون أي مشاكل أو نفسيات».

وانتقد خضر ما تعرضت له زوجته الحالية وياسمين من انتقادات وتعليقات عبر مواقع التواصل الاجتماعي، قائلًا: «مراتي اللي إنتوا نازلين فيها تجريح وتقطيع بدون ذنب، زي ما نزلتوا تجريح في ياسمين بدون ذنب لما طلعت معايا في مهرجان الجونة وسخرتوا منها عشان ماكانش عاجبكم شكلها واتريقتوا عليها ودمرتولها نفسيتها لمجرد إنها مش شبه أمها».

وأضاف: «لدرجة إنها حلفت ما تطلعش في مهرجانات تاني من ساعتها.. ولا نسيتوا؟ كومنتاتكم وجرحكم ليها وسخريتكم منها وألفاظكم النبيلة لسه موجودة على فيسبوك على فكرة».

وعن الحالة الصحية لياسمين والإجراء الطبي الذي خضعت له، قال خضر: «وممكن أحكيلكم مين اللي ضحك على ياسمين ووالدتها وأقنعهم إنها تعمل قسطرة تكميلية في المستشفى بتاعتها، بدل الجراحة التكميلية اللي الدكتور الإسباني رفض يعملها عشان مايحصلش مضاعفات واحتمال وفاة».

وأوضح: «الدكتور الإسباني حذرها من القسطرة وأنا وزين حذرناها، وللأسف عملتها من ورا ضهرنا».

وتابع: «وممكن أحكيلكم على كل حاجة، كل اللي نفسكم تعرفوه».

ووجه خضر رسالة إلى المتابعين، طالبهم خلالها بعدم التدخل في حياتهم الخاصة، قائلًا: «بس بشرط.. كل واحد فيكم يحكيلنا الأول عن أسرار بيته والخبايا اللي محدش ينفع يعرفها، وعلاقتكم كأسرة وعلاقتكم كأزواج، ومين عمل إيه بالتفصيل ومين راح فين».

وأضاف: «يا إما خليكم في حالكم وسيبوا الناس في حالها».

وأكد أن علاقته بياسمين لم تنقطع بعد الطلاق، موضحًا: «إحنا لا علينا دين لحد ولا مطالبين نحكي أسرارنا لحد، ومن يوم طلاقنا وأنا تحولت من زوج ياسمين لأخوها الثالث مش طليقها، وتحولت ياسمين من زوجتي لأختي التانية مش طليقتي».

وتابع: «وغلاوتها في قلبي هتفضل زي غلاوة ندى أختي لآخر يوم في عمري».

واختتم خضر حديثه قائلًا: «إحنا كنا أسرة خيال علمي»، داعيًا لياسمين بالرحمة والمغفرة، ولابنتها وأسرتها بالصبر والقوة، ومطالبًا بوقف تداول تفاصيل حياتهم الخاصة، قائلًا: «وياريت كفاية ترندات وقرف وسيبونا في حالنا بجد».

وأشار إلى أن الصورة التي نشرها مع حديثه تعود إلى حفل تخرج ابنته زين من المدرسة في 28 يونيو 2025، أي بعد مرور ستة أشهر على انفصاله عن ياسمين.