أشاد الناقد كريم المصرى بأداء الفنان الشاب عمر رزيق فى حكاية «لعبة جهنم» أولى حكايات مسلسل القصة الكاملة، مشيرًا إلى امتلاكه موهبة لافتة وقدرة كبيرة على تقديم الشخصيات المركبة، خاصة من خلال شخصية «سليم» التى قدمها ضمن أحداث العمل.

وكتب كريم المصرى عبر حسابه الرسمى على «فيسبوك»؛ قائلًا: «من فترة كبيرة ماشفتش موهبة شابة زى عمر رزيق بتمتلك القدر ده من الاتقان احنا قدام موهبة لو تم الاهتمام بيها واتخطط ليها صح هتصنع رصيد كبير، أكتر حاجة شدتنى فى أداء عمر رزيق فى لعبة جهنم انه ماحاولش يقنعنا ان الشخصية شريرة وده فرق مهم، لأن ممثلين كتير لما بيمسكوا شخصية فيها جانب مظلم بيبداوا يعلنوا ده للمشاهد بالصوت والنظرات والانفعالات وكان الشخصية بتقولنا طول الوقت خد بالك انا خطر».

وأضاف: «عمر عمل العكس ساب الشخصية تتصرف بطبيعتها من غير ما يضيف عليها علامات تحذير وده اللى خلى فى لحظات معينة تصرفاته عادية جدا لكن الاحساس اللى بيسيبوه وراه مش عادى ساب سليم يبقى مراهق عادى فى لحظة ومراهق مهان فى لحظة وشخص عنده رغبة فى السيطرة فى لحظة تانية من غير ما يحط فاصل تمثيلى واضح بين كل وجه والتانى وده تحديدا اللى خلى الشخصية مقلقة أنك مش قدام شرير تقليدى شايف شره على وشه انت قدام ولد صغير بيكتشف أن العالم الافتراضى ممكن يديله القوة اللى مش قادر يملكها فى حياته الحقيقية عمر فهم النقطة دى كويس جدا وعشان كده حتى اللحظات اللى سليم فيها بيتصرف بشكل عادى بتفضل حاسس ان فيه حاجة غلط تحت السطح».

وتابع: «بالنسبة لى دى واحدة من المواهب اللى تستحق إننا نقف عندها مش لأنها عملت دور صعب وخلاص لكن لأنها فهمت أن أصعب حاجة فى الشخصية دى أنك ما تلعبش شرها تلعب انسانيتها المختلة والفرق بينهم كبير جدا».

وتدور أحداث «لعبة جهنم» حول جريمة إلكترونية مستوحاة من وقائع حقيقية، تبدأ من العالم الافتراضى قبل أن تتطور إلى أحداث مأساوية على أرض الواقع، فى إطار درامى يكشف تأثير العلاقات والتفاعلات عبر الإنترنت عندما تتجاوز حدود الشاشة.

وتتناول الحكاية، التى كتبها سامح سند، قصة مراهق عبقرى يبدو مثاليًا، ورجل يظهر بصورة مختلفة عبر الإنترنت، قبل أن تتقاطع طرقهما داخل لعبة تتجاوز حدود العالم الافتراضى، لتقود التحركات الرقمية إلى سلسلة من الأحداث الخطيرة.

وتأتى «لعبة جهنم» كأولى حكايات مسلسل «القصة الكاملة»، الذى يقدم مجموعة من الحكايات الدرامية المنفصلة المستوحاة من جرائم وأحداث حقيقية أثارت اهتمام الرأى العام المصرى، حيث تمتد كل حكاية على مدار ثلاث حلقات، بأبطال وفريق عمل مختلفين.

ويشارك فى بطولة «لعبة جهنم» إلى جانب محمد فراج، كل من عمر رزيق، وكريمة منصور، وياسر عزت، بينما يتناول المسلسل فى كل حكاية جريمة مختلفة، مع التركيز على ملابساتها وتفاصيلها والشخصيات المرتبطة بها.