فتوح أحمد يحكي ذكرياته مع نور الشريف وأول موقف جمعه بـ أحمد زكي (فيديو)

في حال واجهت مشكلة في مشاهدة الفيديو، إضغط على رابط المصدر للمشاهدة على الموقع الرسمي

كشف الفنان فتوح أحمد عن موقف جمعه بالفنان الراحل نور الشريف حول مفهوم السعادة وعلاقتها بالمال، موضحًا أن السعادة ليس لها علاقة بالمال كاشفاً عن أول موقف جمعه بالفنان الراحل أحمد زكي.

وقال فتوح أحمد، خلال لقائه مع الإعلامية نهال طايل في برنامج «تفاصيل» المذاع على قناة «صدى البلد2»: «كان حوار بينى وبين نور الشريف، قلت له السعادة والانبساط ملوش علاقة بالفلوس، ده موضوع تانى خالص، ولما كنت بعمل فى الفيلا وبابنى فيها كنت باشتغل كتير جداً، عمرى ما عديت فلوس لأن بيجى الظرف يروح للمقاول، يروح للمهندس، فقعدت حوالى 3 سنين بابنى وأنا بارجع من الشغل فى الشقة اللي كانت فى العمرانية، أنام وأقوم الصبح».

وأضاف: «أوضة النوم اللى أنا اتجوزت بيها هى اللى راحت الفيلا، هى نفس مساحة السرير اللى بانام عليه، مفرقتش أنا فى الشقة كنت بانام نوم عميق لغاية الصبح، فى الفيلا بقا، ألاقى واحدة بتغمزنى فى كتفى، وأقوم مفزوع، تقول الكلب بيهوهو فى الجنينة، قوم بص، وفى صوت عند حمام السباحة، إيه ده؟، وأقوم بالليل فى عز السقعة الدنيا برد، وبعدين قالى الفنان نور الشريف بس إنت بقيت فى فيلا لما باقوله قعدت 3 سنين، قلت له أصل أنا قلت له إن الشغلانة دى الحاجة الوحيدة اللى بناخدها منها البريك».

وتابع: «قلت له كلنا أجرنا موحد، هو البريك اللى بناخده من التمثيل، قالى إزاى؟ قلت له ما هو يا أستاذ نور فى ناس بياخدوا ملايين بتروح البنك، وما بيشوفهاش بعد كدا، الفلوس دى محدش عارف بتاعة مين بعد كدا، مين اللى هياخد الفلوس دى؟ إنما هى اللقمة اللى بناكلها، قلت له حضرتك بتاخد بناتك وتروحوا تتفسحوا مثلاً فى أوروبا فى شرق آسيا، قال لى آه، قلت له بتصرف كام فى الرحلة دى؟ على الأقل 30 ألف دولار، قال لى آه والله.»

وتابع: «قلت له هاقولك على ناس عندنا فى عزبة أبو قرن الراجل بياخد مراته والعيال على عربية كارو ويروح جنينة الحيوانات أو القناطر، بيرجعوا كم من السعادة مقدرش أقولك السعادة اللى هما فيها قد إيه هو وأولاده، وصارف كام فى الرحلة دى 30 جنيه، فإنت هل تقدر تقولى إن السعادة بتاعتك أكبر من السعادة بتاعتهم، قالى لأ، قلت له هى المسألة فرق فى الأوبشن».

وأوضح الفنان فتوح أحمد، أنه عندما قابل الفنان الراحل أحمد زكي قال له نصًا: «أنت فنان .... زيى أنا، بس مكانش يقصد حاجة وحشة ولكن معنى الكلمة دي إنى مش باعمل حساب لكل خطوة وبامثل وباسيب نفسى للى بيحصل».