زينة: اتخضيت من جري الناس عليّ بعد ورد وشوكولاته دى لقطة النجاح الكبير

منذ

أكدت النجمة زينة أنها تلقت ردود أفعال قوية جداً عن دورها في مسلسل ورد وشوكولاته الذى قامت ببطولته وانتهى عرض حلقاته مطلع هذا الأسبوع، مشيرة في ندوة اليوم السابع إلى أنها شعرت باندهاش حقيقي من حجم النجاح وحالة التفاعل الجماهيرى مع العمل والدور وذلك شاهدته على أرض الواقع وفى الشارع.

ردود أفعال كبيرة بعد عرض مسلسل ورد وشوكولاته

وقالت زينة :"أنا شفت ردود أفعال كبيرة قوي، بجد اتخضيت، الحمد لله يا رب. لسه قريب كنت في أوتيل استعدادًا لمهرجان القاهرة، ولقيت ناس بتجرى عليّ، ناس من الكويت ودول عربية، بيجروا جري غير طبيعي عشان يسلموا عليّ، فطبيعى إن حد يقوم يسلم عليّ لو أنا معدية، لكن المشهد اللي شوفته، ناس بتجري وبتعمل مجهود كبير، دي لقطات ما بتحصلش غير بعد نجاح كبير، وأنا عارفاها كويس".

ردود الفعل الحقيقية تأتي من الشارع لا السوشيال ميديا

وأوضحت زينة أن السوشيال ميديا لا تكون دائماً معياراً دقيقاً للنجاح، قائلة:"في السوشيال ميديا ساعات بنشوف حاجات مش ناجحة ونلاقي عليها ردود أفعال كبيرة. لكن أنا رد الفعل الحقيقي بشوفه في الشارع… لأن بعد كل نجاح باختفي وبارتا، "زمان كنت أنزل أماكن لما أحقق نص نجاح، كنوع من إثبات النجاح، لكن دلوقتي، أنا ما بضحكش على نفسي".

ثقتها في نفسها تأتي من احتكاكها بالناس

وأشارت زينة إلى أنها لا تعتمد على الألقاب أو الشعارات لتقييم نفسها، قائلة:"أنا عمري ما قلت ده إحنا نمرة واحد. ولا عمري ضحكت على نفسي. أنا عارفة إذا كنت اتأخرت ولا لأ، نجحت ولا لأ، لأني بشوف ده بعيني في الشارع فأنا شخص مختلط بالناس، بروح السوبر ماركت، النادي، الجيم. وبشوف تعامل الناس، وده بيبينلي حاجات كتير".

تقدّر النقد الصادق وترفض المجاملات

وأكدت زينة أنها من الأشخاص الذين يتقبلون النقد الحقيقي ويعتبرونه وسيلة للتطور، قائلة:"أنا عندي أصحاب، ممكن يقولولى في وشي حاجة وحشة، وأنا بسمع، مش من النوع اللي بيضحك على نفسه، وده أخطر نوع على فكرة، أنا ممكن ما اسمعكيش لو بتمدحي، بس أسمعك قوي لو بتنتقديني في حاجة صح، لأن ده اللي يفيدني".

وأوضحت مثالًا:"لو حد بيقول غيّرى تسريحة شعرك، لا، مش هسمع، أنا عجباني كده، واحد النهاردة كاتب إنى لابسة باروكة! ماشى، لكن لو حد قال نقد حقيقي في الشغل، أسمعه جداً جداً، وأنا أصحابى اللى قريبين منى أكتر ناس بسمع منهم العيوب قبل المميزات، لأن ده اللى بيخلينى أبقى أحسن، مافيش حد من غير غلط، بس غلطاتنا بتقل لما نسمع الصح".

اليوم السابع يُكرم زينة

كرّم اليوم السابع النجمة زينة عن دورها المميز في مسلسل ورد وشوكولاتة، الذي حقق نجاحاً كبيراً خلال الأسابيع الماضية، حيث تألقت زينة في تجسيد شخصية "مروة"، ونالت إعجاب الجمهور والنقاد على حد سواء، بفضل أدائها القوي والمشاهد المؤثرة التي قدمتها، سواء في لحظات الانفعال أو في المشاهد الإنسانية العميقة التي أضفت عليها طابعاً مميزاً.