زينة تكشف سر تناغمها مع المؤلف محمد رجاء: أفضل من يكتب مشاعر الست

منذ

تحدثت النجمة زينة خلال ندوة اليوم السابع عن تعاونها مع الكاتب محمد رجاء في مسلسل ورد وشوكولاتة الذى انتهى عرض حلقاته مطلع هذا الأسبوع محققاً نجاحاً جماهيراً كبيراً، مؤكدة وجود حالة تناغم فريدة بينهما، خاصة بعد نجاحهما السابق فى مسلسل الليلة واللى فيها الذى تم عرضه عام 2022.

زينة: بفهم محمد رجاء وهناك تناغم بيننا

وقالت زينة خلال ندوة اليوم السابع: "أنا بحب محمد رجاء أوى، وبفهمه أوى، وهو بيحبنى وبيفهمنى، فى تناغم كده بينا يعنى مش عارفة أقولها إزاى، والموضوع مش بس كيمياء أو فيزياء وأحياء، الموضوع أكبر من كده، إن هو مش بيشوف غيرى فى الورق اللي بيكتبه، وأنا لما بقرأ أى سيناريو بيجيلى منه خلاص قبل ما بيطلع فبشتغل".

وأضافت زينة: "أنا لما بقرأ أى حاجة دلوقتى كتبها محمد رجاء بقول له: "انت عملت لى عقدة، أنا مش عارفة أشتغل حاجة، مش عارفة أعمل حاجة تانية، عشان كده من بعد ما عملنا الليلة واللى فيها، فالحاجات اللي كانت بتيجيلى كنت بقول: "يلا يلا هاشتغل دلوقتى على طول، حاجات حلوة وكويسة ونجحت أوى وكسرت الدنيا، وكانت مع مخرجين كبار وكتاب مهمين وكل حاجة".

زينة: محمد رجاء بيكتب عن مشاعر الست كويس أوى

وتابعت مؤكدة أنّ حساسية كتابات محمد رجاء تجاه مشاعر المرأة هى ما يميز نصوصه: "دلوقتى أنا مبقتش أعرف أقرأ الحوار بتاع الناس دلوقتى، عايزة كتابة رجاء دايماً، لما بيتعرض على حاجات، ساعات أقول للمخرجين "يا سلام لو الحوار ده كان كاتبه محمد رجاء، بقى يا سلام! هو حساس قوى، بيكتب عن المشاعر بتاعة الست حلو أوى".

وانتقلت زينة للحديث عن تعاونها مع الكاتب والمخرج محمد أمين، فقالت:"محمد أمين صاحبي. اشتغلت مع أمين كتابة وإخراج في فيلم بنتين من مصر، وكتابة أستاذ محمد أمين لها نفس الطعم، وكمان محمد خان من المخرجين الل، كانوا عندهم نفس المشاعر، وأنا كان عندى فيلم معاه وما عملتوش للأسف، الناس دول بيكتبوا بإحساس، وبيحسّوا بأحاسيس الست".

زينة: أتمنى كل شغلى القادم يكون مع محمد رجاء

وختمت حديثها بالتأكيد على مكانة محمد رجاء الخاصة لديها: "محمد رجاء، أنا لما بقرأ ورقه بحس إن اللي كاتبه لازم تبقى ست، لأن الأحاسيس دي مفيش رجالة بيحسّوا بيها ولا بيكتبوها في السيناريوهات، إنما رجاء كده بقى، بعتبره عظيم فى الجزئية دى، وأنا بحبه جداً ونفسى كل الشغل اللى جاى أشتغله معاه، بجد والله".

كرّم اليوم السابع النجمة زينة عن دورها المميز في مسلسل ورد وشوكولاتة، الذي حقق نجاحاً كبيراً خلال الأسابيع الماضية، حيث تألقت زينة في تجسيد شخصية "مروة"، ونالت إعجاب الجمهور والنقاد على حد سواء، بفضل أدائها القوي والمشاهد المؤثرة التي قدمتها، سواء في لحظات الانفعال أو في المشاهد الإنسانية العميقة التي أضفت عليها طابعاً مميزاً.