شاهيناز العقاد: أفلامنا وصلت للعالمية لأنها نابعة من قضايا إنسانية حقيقية

منذ

ردت المنتجة شاهيناز العقاد خلال الجلسة الحوارية تحت عنوان "المحتوى السينمائي العربي: عن سؤال حول وصول أفلامها لمهرجانات كبرى وما إذا كانت هناك عناصر جذب في أعمالها قالت: "أهم حاجة إننا مش بنعمل قصة لمجرد إرضاء الناس، لان الأساس إن القصة تكون محلية وصادقة، بتحكي واقع البلد، ومن خلالها يقدر العالم يفهم إحنا بنعيش إزاي وإيه اللي بيحصل عندنا، ولما القصة تكون صادقة وطلعة من بيئة حقيقية، العالمية بتيجي لوحدها".

وتابعت شاهيناز العقاد : إحنا ماكنش هدفنا الأساسي الوصول للعالمية، لكن بالفعل قدرنا نعبر الحدود، وكتير من أفلامنا بتتكلم عن قضايا إنسانية زي الحرب والهجرة واللجوء وغيرها، ودي موضوعات بيشترك فيها البشر في كل مكان".

وأضافت: "أنا بعمل الحدوتة الحلوة، والأساس دائمًا القصة، ومعظم الأفلام اللي كسبت جوائز عالمية كانت نابعة من تجارب شخصية للمخرجين لأنها صادقة، وأنا بشارك في إنتاج الأفلام اللي بحس إنها قريبة من ذوقي وفيها رؤية".

واستكملت: السينما المصرية نموذج يُحتذى، لأنها الدولة العربية الوحيدة اللي تمتلك صناعة سينما متكاملة، وعندها بنية تحتية قوية، ونجوم، وكاريزما، وجمهور واسع عنده شغف بالسينما. المفروض نكون أفضل من كده بكتير".

واختتمت شاهيناز العقاد حديثها: "اللي ناقصنا إننا نشتغل بشكل أكثر احترافية، وأهم حاجة نركز على ورش كتابة احترافية، لأن أحيانًا المخرج بيلاقي نفسه قدام ورق ضعيف ومحدود".