مؤلف كارثة طبيعية يرد على تساؤلات الجمهور قبل طرحه على watch it: واقعى مش خيال

حرص أحمد عاطف فايد على التفاعل مع متابعيه عبر فيس بوك من خلال الإجابة على تساؤلات متابعيه حول برومو مسلسل كارثة طبيعية من خلال بوست بعنوان: "إجابات سريعة على أسئلة بتتسألى كتير منذ نزول برومو كارثة طبيعية".

مصدر الصورة
أحمد عاطف فايد على فيس بوك

وكتب أحمد عاطف ما يلي: "المسلسل 10 حلقات ... هينزل حلقتين كل يوم أربع بداية من الأربع الجاى بإذن الله على WATCH IT ، كارثة طبيعية مش مسلسل خيال علمى ولا حدث خارق للطبيعة.. هو قصة واقعية لزوج وزوجة مصريين عاديين بيمروا فجأة بحدث بيشقلب حياتهم تماماً.. والحدث ده ممكن يحصل لأى حد عادى.. وهى إن الزوجة بتحمل فى 5 أطفال مرة واحدة كحالة توائم متعددة.. ودى حالة حصلت كتير بالمناسبة في مصر والعالم كله.. والرقم القياسى المتسجل في مصر لحالات التوائم المتعددة.. هي ست جابت 9 أطفال في بطن واحدة.. واستضافها عمرو الليثى واللقاء موجود على اليوتيوب (بس محدش يتفرج عشان مانكسبهوش أرباح)".

وأضاف: "فين بالطو 2؟.. مبسوط طبعاً جداً انكو بعد سنتين ونص تقريبا لسه بتسألونى على بالطو 2 فى كل مناسبة.. بس الحقيقة أنا مش عارف مين قال إن فيه بالطو.. بالنسبالى قصة دكتور عاطف خلصت وماكنتش حابب فكرة إنى أكتب جزء تانى لمجرد استغلال نجاح الجزء الأول بدون ما يكون فيه حاجة معينة عايزين نقولها من المسلسل.. وده كمان مكنش رأيي لوحدى.. لأ كان رأى منصة واتشت بردو اللى كانت مقتنعة بكده جداً وكانت ضد استغلال النجاح.. وكذلك أصدقائى الأعزاء عصام عمر وعمر المهندس كانو بيفكروا بنفس الطريقة دى وده نفس رأيهم".

وتابع: "أيوة اللى شوفتوه ف البرومو صح.. الأستاذ كمال أبو رية معانا في المسلسل وبقينا أصدقاء جداً (اعترفتله فى أواخر تصوير المسلسل على حوار إن أنا اللى اكتشفت مسلسل عزمى وأشجان بتاعه هو وفيفى عبده وفضحته.. بس ده محتاجله بوست منفصل هبقى أحكيلكو قالى إيه خلونا في كارثة طبيعية دلوقتى".

وأتم: "أول حلقتين بعد بكرة 10 صباحا.. يعنى تصحوا بدرى متكدرين تفطروا تلاقوا الحلقات موجودة أظن مفيش دلع أسوأ من كده، وفى النهاية أتمنى المسلسل يعجبكو إن شاء الله ومستني بجد الفيدباك بتاعكو على الوحش قبل الحلو فى المسلسل".